नाशिकमध्ये २० लाखांच्या खंडणीसाठी युवकाची दगडाने ठेचून हत्या

नाशिकमध्ये २० लाखांच्या खंडणीसाठी मोहित बाविस्कर या युवकाची दगडानं ठेचून हत्या केल्याची खळबळजनक घटना उघड झाली आहे. १५ तारखेला या युवकाचं अपहरण झालं होतं. याप्रकरणी सरकारवाडा पोलिस ठाण्यात युवक हरवल्याची तक्रारही नोंदवण्यात आली होती.

मात्र, आज तरुणाचा मृतदेह सापडल्यानं एकच खळबळ उडाली. मोहित हा मालेगावचा रहिवासी असून नाशिकच्या कॉलेजमध्ये शिक्षण घेत होता. तो मित्रांसोबत गोळे कॉलनीत राहत होता. मात्र, १५ तारखेपासून मोहित बेपत्ता होता.

या प्रकरणाचा पोलीस अतिशय गुप्तपणे तपास करीत होते. मात्र, काल एक बेवारस मृतदेह नाशिक पोलिसांना आढळून आला होता. याच मृतदेहाच्या ओळख परेडसाठी मोहितच्या कुटुंबियांना बोलविण्यात आलं होतं. त्यावेळेस हा मोहितचाच मृतदेह असल्याचे कुटुंबियांनी पोलिसांना सांगितले. सध्या आरोपींचा शोध सुरु आहे.