शहरातील विविध जलकेंद्रांमधील विद्युत आणि स्थापत्यविषयक तातडीच्या देखभाल-दुरुस्तीच्या कामामुळे येत्या गुरुवारी (२३ एप्रिल) संपूर्ण शहराचा पाणीपुरवठा बंद राहणार आहे; तसेच दुसऱ्या दिवशी म्हणजे शुक्रवारी (२४ एप्रिल) सकाळी उशिरा आणि कमी दाबाने पाणीपुरवठा होण्याची शक्यता महापालिकेच्या पाणीपुरवठा विभागाचे प्रमुख नंदकिशोर जगताप यांनी व्यक्त केली. बुधवारी मध्यरात्री १२पासून गुरुवारी रात्री १२पर्यंत पाणीपुरवठा पूर्णपणे बंद राहणार आहे.
शहरात आठवड्यातून एक दिवस पाणीपुरवठा बंद ठेवणे किंवा दिवसाआड पाणी देण्याचा प्रस्ताव महापालिका प्रशासनाकडून तयार होत आहे. त्याचाच भाग म्हणून आठवड्यातून एकदा पाणी बंदचा निर्णय घेतला जाण्याची शक्यता वर्तविण्यात येत आहे. महापालिका प्रशासनाकडून सध्या तरी जलकेंद्रांमधील विद्युत आणि स्थापत्यविषयक तातडीच्या देखभाल-दुरुस्तीच्या कामामुळे पाणी बंद राहणार असल्याचे सांगण्यात येत आहे. महापालिका प्रशासनाने गेल्या आठवड्यातच एक दिवस पाणीपुरवठा बंद राहणार असल्याचे जाहीर केले होते. मात्र, टँकरचालकांकडून संप पुकारण्यात आल्याने हा निर्णय रद्द करण्यात आला होता.
यंदा एल निनोच्या प्रभावामुळे पाऊस कमी पडण्याची शक्यता व्यक्त केली जात आहे. त्यामुळे धरणांतील पाणीसाठा ३१ ऑगस्टपर्यंत टिकवून ठेवण्याच्या सूचना राज्य सरकारकडून देण्यात आल्या आहेत. या अनुषंगाने जलसंपदा विभागाने पुणे आणि पिंपरी-चिंचवड महापालिकेला पुढील काही महिने १५ टक्के पाणीकपात करण्याची नोटीस बजावली आहे. या पार्श्वभूमीवर खरेच दुरूस्तीची कामे करण्यात येत आहेत, की अप्रत्यक्ष पाणीकपातीला सुरूवात झाली आहे, याची चर्चा सुरू झाली आहे.
-मध्यवर्ती पेठा : गुरुवार पेठ, बुधवार पेठ, गंज पेठ, भवानी पेठ, नाना पेठ, सोमवार पेठ, दत्तवाडी, राजेंद्रनगर, लोकमान्यनगर आणि डेक्कन परिसर.
-पर्वती व परिसरः सहकारनगर, पद्मावती, बिबवेवाडी, मुकुंदनगर, महर्षीनगर, गंगाधाम, चिंतामणीनगर, अप्पर व लोअर इंदिरानगर, स्वारगेट आणि पर्वती गावठाण.
-सिंहगड रस्ता व कात्रज: हिंगणे, आनंदनगर, वडगाव, धायरी, आंबेगाव, दत्तनगर, धनकवडी, कात्रज, भारती विद्यापीठ परिसर आणि येवलेवाडी.
-कोथरूड व वारजे: संपूर्ण कोथरूड, बावधन, पाषाण, सुतारवाडी, शिवणे, वारजे माळवाडी, कर्वेनगर, डहाणूकर कॉलनी, आयडियल कॉलनी आणि गुजरात कॉलनी.
-नगर रोड व हडपसर: खराडी, चंदननगर, येरवडा, लोहगाव, वाघोली, हडपसर गावठाण, सासवड रोड, महंमदवाडी, फुरसुंगी आणि उरुळी देवाची.
-शिवाजीनगर व औंध: मॉडेल कॉलनी, भोसलेनगर, सेनापती बापट रोड, गोखलेनगर, औंध, बोपोडी, खडकी आणि पुणे विद्यापीठ परिसर.
-नव्याने समाविष्ट गावे: खडकवासला, नांदोशी, सणसनगर, किरकटवाडी, धायरी आणि नन्हे या भागांतील बूस्टर पंपिगअंतर्गत येणाऱ्या परिसरातही पाणीपुरवठा खंडित राहील.