ठाणे क्लब येथे आयोजित प्रदर्शनातील स्टॉलवरुन एका तरुणीने हातोहात कुर्ता-दुपट्टा मटेरियल सेट लंपास केल्याचा प्रकार समोर आला आहे. स्टॉल धारक वंदना पवार यांनी इन्स्टाग्रामवर सीसीटीव्ही फूटेज शेअर करत सेट चोरणाऱ्या महिलेचा चेहरा दाखवला आहे. आर्थिक नुकसानासोबतच चोरी करणाऱ्या महिलेच्या मानसिकतेवरही त्यांनी प्रश्न उपस्थित केला आहे.
काय आहे इन्स्टाग्राम पोस्ट?
मी वंदना पवार, एक नम्र विनंती करते. ३० जानेवारी ते १ फेब्रुवारी या कालावधीत, ठाणे क्लबमध्ये आयोजित मेष प्रदर्शनात ‘तिशी क्रिएशन्स’ हा आमचा स्टॉल होता. ग्राहकांकडून आम्हाला प्रचंड आणि मनापासून प्रतिसाद, कौतुक, गप्पा आणि खूप प्रेम मिळाले. ते खरोखरच आमच्यासाठी खूप महत्त्वाचे होते.
आमचा स्टॉक तपासताना आम्हाला लक्षात आले की एक हँडक्राफ्टेड खण कुर्ती आणि दुपट्टा मटेरियल सेट गहाळ होता. आयोजकांच्या सहकार्याने आम्ही सीसीटीव्ही फुटेज तपासले. आम्हाला जे दिसले ते खूप अस्वस्थ करणारे होते. एक सुसंस्कृत, सुशिक्षित दिसणारी महिला शांतपणे तो सेट उचलते, काही क्षण थांबते… आणि नंतर शांतपणे तो घेऊन निघून जाते.
महिलेच्या मानसिकतेवर प्रश्न
त्या क्षणी, माझ्या मनात अनेक प्रश्न निर्माण झाले… हे करताना एखाद्याच्या मनात काय चालले आहे? हस्तनिर्मित वस्तूला फक्त कापड म्हणून पाहिले जाते का? त्यामागील महिन्यांच्या मेहनतीचा, कारागिराच्या कौशल्याचा आणि एका लहान व्यवसायाच्या विश्वासाचा विचार केला जात नाही का?
हे केवळ आर्थिक नुकसान नाहीये… हा विश्वासाला धक्का आहे. ज्या व्यक्तीने हे केले आहे, मी मनापासून आशा करते, की तुम्ही थोडा वेळ विचार कराल आणि तुमच्या कृत्याबाबत चिंतन कराल.