यवतमाळ जिल्ह्याच्या वणी तालुक्यातील अनियंत्रित कार दुभाजकावरून उसळून महामार्गाच्या दुसऱ्या लेनवर आदळल्याने समोरून भरधाव येणाऱ्या ट्रकने कारला जोरदार धडक दिली. या भीषण अपघातात एकाच कुटुंबातील चार जणांचा दुर्दैवी मृत्यू झाला. ही मन हेलावणारी घटना शुक्रवार 31ऑक्टोबरला सकाळी 10.30 वाजताच्या सुमारास वणी घुगुस मार्गावरील जन्नत सिलिब्रेशन हॉल पासून काही अंतरावर घडली. कुटुंबातील मुलगी कार चालविणे शिकत असताना हा भीषण अपघात घडला.
शहरातील भीमनगर परिसरातील बुद्धविहाराजवळ वास्तव्यास असलेले रियाज शेख रकिउद्दीन शेख(52) हे मेकॅनिक मिस्त्री होते. रियाज मिस्त्री म्हणून लालपुलिया परिसरात ते सर्वांनाच परिचित होते. उत्तम ट्रक मेकॅनिक म्हणून ते प्रसिद्ध होते. चिखलगाव ग्रामपंचायत हद्दीत त्यांचं गॅरेज देखील आहे. शुक्रवारी लालपुलिया परिसरातील सर्व दुकाने व गॅरेज बंद ठेवली जातात. त्यामुळे ते आपल्या मुलीला कार चालविणे शिकविण्याकरिता घुग्गुस मार्गाने कार घेऊन गेले होते. घुग्गुस मार्गाने वणीकडे येत असताना त्यांची मुलगी माहेरा ही कार चालवत होती.अशातच जन्नत हॉल जवळ माहेरा हिचे कारवरील नियंत्रण सुटले आणि कार दुभाजकावरून उसळून महामार्गाच्या विरुद्ध लेनवर आढळली. दरम्यान त्या लेनवरून घुघुसकडे जाणाऱ्या ट्रकने कारला जोरदार धडक दिली. धडक एवढी भीषण होती की कार पूर्णतः चक्काचूर झाली. यात कारमधील रियाज शेख(52), माहेरा रियाज शेख(17), झोया रियाज शेख(१२), अनिबा रियाज शेख (10) यांचा दुर्दैवी मृत्यू झाला. तर रियाज यांच्या भावाची पाच वर्षीय मुलगी इनाथा शारीख शेख ही गंभीर जखमी झाली असून तिच्यावर नागपूर येथे उपचार सुरू आहे.
कार चालविणाऱ्या मुलीसह तिच्या दोन बहिणी घटनास्थळीच ठार झाल्या तर वडील रियाज शेख यांना ग्रामीण रुग्णालयात दाखल केल्यानंतर त्यांचा मृत्यू झाला. या विचित्र व भीषण अपघातात एकाच कुटुंबातील चार जणांचा दुर्दैवी मृत्यू झाल्याने शहरात हळहळ व्यक्त होत आहे. घटनेचा पुढील तपास ठाणेदार गोपाल उंबरकर यांच्या मार्गदर्शनात पोलिस करीत आहेत.