खुनाच्या गुन्ह्यात अटक झालेल्या तरुणास लवकर जामीन मिळवून देणे; तसेच न्यायालयात आरोपपत्र दाखल करण्यासाठी मदत करण्याच्या बदल्यात २५ हजार रुपयांची लाच मागणाऱ्या पोलिस हवालदाराला लाचलुचपत प्रतिबंधक विभागाने (एसीबी) अटक केली आहे.
रमेश लक्ष्मण नागटिळक (वय ४२, रा. शारदानगर, माळेगाव, बारामती) असे अटक रेलेल्या पोलिस हवालदाराचे नाव आहे. या प्रकरणी एका महिलेने लाचलुचपत प्रतिबंधक विभागाकडे तक्रार केली होती.
पोलिसांनी दिलेल्या माहितीनुसार, तक्रारदार महिलेच्या मुलाविरुद्ध बारामती तालुक्यातील वडगाव निंबाळकर पोलिस ठाण्यात खुनाचा गुन्हा दाखल आहे. या गुन्ह्याचा तपास करंजेपुल चौकी अंतर्गत सुरू असून, नागटिळक त्या ठिकाणी नियुक्त होते. हवालदार नागटिळक व चौकीतील उपनिरीक्षकाने ३० हजार रुपयांची लाच मागितल्याची तक्रार महिलेने १८ जानेवारी रोजी एसीबीकडे केली होती. पडताळणीनंतर नागटिळक याने तडजोडीत २५ हजार रुपयांची लाच मागितल्याचे निष्पन्न झाले, तर उपनिरीक्षकाने लाच मागितली नसल्याचे स्पष्ट झाले. त्यानंतर वडगाव निंबाळकर पोलिस ठाण्यात गुन्हा दाखल करून नागटिळक याला अटक करण्यात आली.पोलिस अधीक्षक शिरिष सरदेशपांडे, अतिरिक्त पोलिस अधीक्षक अजित पाटील व अर्जुन भोसले यांच्या मार्गदर्शनाखाली निरीक्षक अविनाश घरबुडे यांच्या पथकाने कारवाईत सहभाग घेतला. पोलिस निरीक्षक आसावरी शेडगे तपास करीत आहेत.
तर दुसऱ्या एका घटनेत, गुन्हे शाखेतील पोलिस अधिकारी असल्याची बतावणी करून ‘डिजिटल अटक’ करण्याची भीती दाखवून सायबर चोरट्यांनी एका ७५ वर्षीय व्यक्तीची साडेतीन लाखांची फसवणूक केल्याची घटना मुंढवा भागात उघडकीस आली. या प्रकरणी मुंढवा पोलिसांत गुन्हा नोंदवण्यात आला आहे. २२ ते २९ नोव्हेंबर २०२५ या काळात हा प्रकार घडला आहे.