पुणे जिल्ह्यात लाडक्या बहिणींना ‘ई-केवायसी’ केल्यानंतरही अनुदानाचा लाभ मिळत नसल्याने त्या सव्वादोन लाख बहिणींची थेट पडताळणी होणार आहे. मात्र, आतापर्यंत जिल्ह्यात १२०१ पुरुष लाभार्थी लाभ घेत असल्याची धक्कादायक माहिती पुढे आली असून, त्यामध्ये सर्वाधिक हवेलीसह पुण्यातील ४८७ पुरुष लाभार्थ्यांचा समावेश आहे. आता ‘ई-केवायसी’ झालेल्या लाभार्थ्यांसह ते खरोखरच पुरुष लाभार्थी आहेत का याचाही शोध घेण्यात येणार आहे.
राज्यात लाडक्या बहिणींना देण्यात येणाऱ्या दीड हजार रुपयांच्या अनुदानापासून अनेक बहिणी वंचित राहत आहेत. सरकारने लाडक्या बहि णींना ‘ई-केवायसी’ करण्याच्या सूचना दिल्या होत्या. मात्र, यामध्ये अनेक अडचणी आल्या होत्या. अर्ज सबमिट केल्यानंतरही बहि णींना अनुदान सुरू झाले नाही. ज्यांच्या घरी चारचाकी आहेत त्यांना अनुदान सुरू राहिले. मात्र, ज्यांच्या घरी चारचाकी नाही, सरकारी नोकरी नाही किंवा पेन्शनही नाही अशा लाभार्थ्यांना अनुदान बंद झाले. अनेक लाभार्थी महिलांनी तक्रारी केल्याने त्यांची दखल घेऊन महिला व बाल विकास विभागाने ‘ई-केवायसी’ झालेल्या सर्व महिला लाभार्थ्यांची पुन्हा पडताळणी करण्याचे आदेश दिले आहेत. त्यानुसार, जिल्हा प्रशासनाच्या सूचनेनुसार, अंगणवाडी सेविकांमार्फत आता चौकशी केली जाणार आहे.
लाभार्थी महिलांपैकी त्यांच्या घरात सरकारी नोकरीसाठी कोणी आहे का किंवा त्यांच्या कुटुंबीयांपैकी कोणाला सरकारची पेन्शन मिळत आहे का, याची पडताळणी करण्यात येणार आहे. सरकारी नोकरदार असेल किंवा पेन्शनधारक कोणी असेल, तर त्या कुटुंबातील लाभार्थीही अपात्र ठरणार आहे. त्या दोन्हीपैकी कोणीही घरात नसेल किंवा त्याचे लाभार्थी नसतील, तर ती महिला योजनेची लाभार्थी ठरेल.
लाडकी बहीण योजनेचा महिलांप्रमाणे पुरुषही लाभ घेत असल्याची शंका उपस्थित केल्यानंतर शहानिशा करण्याचे सरकारने ठरवले आहे. त्याबाबत संबंधित जिल्ह्यातील प्रशासनाला पुरुष लाभार्थ्यांचा शोध घेण्याचा आदेश दिला आहे.