अरबी समुद्रात उत्तरेकडील वाढत्या थंड वादळी वाऱ्यांची लहर सुरू झाल्याने उरणसह पश्चिम किनारपट्टीवरील मच्छीमारांवर गंभीर संकट ओढावले आहे. गारठलेल्या खोल समुद्रात मासळी मिळेनाशी झाल्याने मत्स्यदुष्काळाची स्थिती निर्माण झाली असून सुमारे ३०० हून अधिक मच्छीमार बोटी मासळीविनाच माघारी परतल्या आहेत. या परिस्थितीमुळे मच्छीमारांचे आर्थिक गणित पूर्णपणे कोलमडले असून हजारो कुटुंबांच्या उदरनिर्वाहाचा प्रश्न ऐरणीवर आला आहे.
सध्या उरणजवळील करंजा बंदरात सुमारे ३०० मासेमारी बोटी नांगरून उभ्या आहेत. खोल समुद्रात मासेमारीसाठी जाण्यासाठी एका बोटीला सहा दिवसांच्या ट्रिपसाठी प्रचंड खर्च करावा लागतो. फक्त डिझेलसाठीच अंदाजे तीन लाख रुपयांचा खर्च होतो. त्याशिवाय बर्फासाठी सुमारे २५ हजार रुपये, १७ कर्मचाऱ्यांसाठी रेशन, पाणी व अन्य साहित्य मिळून एकूण खर्च साडेतीन लाख रुपयांच्या पुढे जातो. एवढा मोठा खर्च करूनही मासळी न मिळाल्याने मच्छीमार हतबल झाले आहेत.
अनेक मच्छीमारांनी सुरुवातीचे सहा दिवस मासेमारी केल्यानंतरही अपेक्षित मासळी मिळाली नाही म्हणून आणखी सहा दिवस समुद्रात थांबण्याचा निर्णय घेतला. मात्र बारा दिवसांच्या प्रयत्नानंतरही मासळीचे प्रमाण अत्यल्प राहिले. त्यातच डिझेल, रेशन संपुष्टात येऊ लागल्याने अखेर शेकडो बोटी मासळीविनाच किनाऱ्यावर परतल्या. ज्यांना मासळी मिळाली, त्यांचे उत्पन्नही खर्चाच्या तुलनेत अत्यंत नगण्य असल्याचे सांगण्यात येत आहे.
या मत्स्यदुष्काळाचा फटका केवळ मच्छीमारांनाच नव्हे तर बाजारातील महिला मासळी विक्रेत्यांनाही बसला आहे. मासळीची आवक मोठ्या प्रमाणात घटल्याने बाजारात विक्रीसाठी मालच उपलब्ध नाही. “मासळीच येत नसेल तर विकणार काय?” असा सवाल उरण येथील महिला विक्रेत्या करत असून त्यांच्या दैनंदिन उत्पन्नावरही गंडांतर आले आहे. पर्ससीन नेट फिशिंग संघटनेचे पश्चिमी तटाचे प्रतिनिधी रमेश नाखवा यांनी सांगितले की, अरबी समुद्रातील शीतलहरींमुळे खोल समुद्रातील तापमानात मोठा बदल झाला असून त्यामुळे मासळी किनाऱ्याजवळ येत नाही. परिणामी सध्या मत्स्यदुष्काळासारखी परिस्थिती निर्माण झाली आहे. खर्च वसूल न झाल्याने मच्छीमारांवर मोठे आर्थिक नुकसान होत असून शासनाने तातडीने मदतीचा विचार करावा, अशी मागणीही त्यांनी केली आहे.