वाघोली परिसरात कौटुंबिक वादातून जन्मदात्या आईनेच पोटच्या अकरा वर्षीय मुलाचा शेतात काम करण्याच्या विळ्याने गळा चिरून खून केल्याची खळबळजनक घटना घडली.मुलाचा खून केल्यानंतर आरोपी आईने मुलीवर ही जीवघेणा हल्ला केला. सुदैवाने मुलगी थोडक्यात बचावली असून तिच्यावर रुग्णालयात उपचार सुरू आहे. वाघोली पोलिसांनी महिलेला ताब्यात घेतले असून खुनाचे कारण जाणून घेत आहेत. वाघोलीतील ‘बायफ रोड’ भागात मंगळवारी सकाळी घडली.
नेमकं काय घडलं?
साईराज संतोष जायभाय (वय ११) असे ठार झालेल्या मुलाचे नाव आहे. या प्रकरणी आई सोनी संतोष जायभाय (रा. बायफ रोड, वाघोली) हिला पोलिसांनी ताब्यात घेतले आहे. जखमी मुलगी धनश्री जायभाय (वय १३) हिच्यावर सध्या रुग्णालयात उपचार सुरू आहेत. जायभाय कुटुंबीय मूळचे नांदेड जिल्ह्यातील कंधार गावचे असून उदरनिर्वाहासाठी वाघोलीत भाड्याने राहण्यास आहे. आरोपी महिला सोनी ही ‘डी मार्ट’मध्ये कामाला होती.पण काही काळापासून घरीच होती. पती बिगारी काम करतो. साईराज हा पाचवीमध्ये शिकत होता.
मागील काही दिवसांपासून पती आणि पत्नीमध्ये कौटुंबिक वाद विकोपाला गेले होते. पती सकाळी घरातून बाहेर गेल्यावर मुलांसोबत वाद झाल्याने आईने घरातील विळ्याने साईराजचा गळा चिरून खून केला. त्यानंतर ती मोठी मुलगी धनश्री हिच्यावर विळ्याने हल्ला करू लागली. हल्ल्यात धनश्री हिच्या गळ्याला, डोक्याला आणि हातावर वार झाल्याने जखमी झाली.
मुलीने जोरजोराने आरडाओरडा केल्यावर शेजारील लोक घरात आले आणि त्यांनी आरोपी महिलेला पकडले. त्यानंतर वाघोली पोलिसांना घटनेची माहिती देण्यात आली. पोलिसांनी घटनास्थळी धाव घेतल्यावर घरात रक्ताचा सडा पडला होता. साईराज जागीच ठार झाला होता तर, मुलीला रुग्णालयात नेण्यात आले.