कल्याणमध्ये शिवसेना ठाकरे गटाच्या पदाधिकाऱ्याचा हृदयविकाराच्या धक्क्याने मृत्यू झाल्याचं समोर आलं आहे. कल्याण पूर्वेतील शिवसेना ठाकरे गटाचे पदाधिकारी रमेश तिखे यांच्या हृदयविकाराने मृत्यू झाल्याची प्राथमिक माहिती आहे. याप्रकरणी पक्षाकडून पोलिसांवर गंभीर आरोप करण्यात आले आहेत.
याप्रकरणी मिळालेल्या अधिक माहितीनुसार, शिवसेना ठाकरे गटातील बेपत्ता नगरसेवकाचे फोटो लावताना रमेश तिखे हे देखील उपस्थित होते. कोळसेवाडी पोलिसांकडून वारंवार फोन येत असल्याने रमेश तिखे यांची तब्येत खालवल्याने ते अस्वस्थ झाले होते, अशी माहिती ठाकरे गटाकडून पत्रकारांना दिली जात आहे.
कल्याण-डोंबिवली महापालिका निवडणुकीत शिवसेना ठाकरे गटाचे मधुर म्हात्रे आणि कीर्ती ढोणे हे दोन नगरसेवक बेपत्ता असल्याची तक्रार ठाकरे गटाने कोळशेवाडी पोलीस ठाण्यात केली होती. पोलीस या प्रकरणाचा तपास करीत असल्याने ठाकरे गटाच्या पदाधिकाऱ्याने पुढाकार घेऊन हे नगरसेवक बेपत्ता असल्याचे पोस्टर शहरात चिटकवले होते. याप्रकरणी मधुर म्हात्रे यांच्या कुटुंबीयांनी पोलीस ठाण्यात तक्रार दिली होती.
पोलीस या तक्रारीनंतर ठाकरे गटांच्या पदाधिकाऱ्यांना याप्रकरणी चौकशीसाठी बोलवण्याकरिता दबाव टाकत होते. या दबावामुळेच ठाकरे गटाचे पदाधिकारी रमेश तिखे यांची तब्येत बिघडली आणि त्यांचा आज पहाटे हृदयविकाराने मृत्यू झाला. हा गंभीर आरोप ठाकरे गटाच्या पदाधिकाऱ्यांनी केला आहे.
रमेश तिखे हे कल्याण पूर्व परिसरातील करपेवाडी परिसरात राहत होते. बेपत्ता नगरसेवकांचे पोस्टर चिटकवण्याकरिता तेही सहभागी झाले होते. बेपत्ता नगरसेवक कुठे आढळल्यास ठाकरे गटाच्या शाखेला संपर्क साधावा अशा आशयाचा मजकूर त्या पोस्टरवर लिहिण्यात आला होता.
बेपत्ता नगरसेवक प्रकरण पोस्टर चिटकवल्याने बेपत्ता नगरसेवकांची बदनामी होत असल्याचा आरोप त्यांचे नातेवाईक दिव्येश म्हात्रे यांनी केला होता. याप्रकरणी म्हात्रे यांनी कोळसेवाडी पोलीस ठाण्यात ठाकरे गटाच्या पदाधिकाऱ्यांच्या विरोधात तक्रार दिली होती. या तक्रारीनंतर पोलिसांनी पोस्टर चिटकवणाऱ्या पदाधिकाऱ्यांना नोटीस बजावली होती. तसेच चौकशी करिता पोलीस ठाण्यात हजर राहावे असा तगादा लावला लावल्याचा आरोप ठाकरे गटाचे पदाधिकारी नीरज कुमार यांनी केला. पोस्टर लावण्या प्रकरणात ठाकरे गटाचे पदाधिकारी तिखे हे देखील सहभागी होते.
पोलिसांनी त्यांना देखील नोटीस बजाव चौकशी करिता हजर राहा असे सांगितले होते. पोलिसांनी हजर राहण्यास सांगितल्याने तिथे यांची प्रकृती खालावली. त्यांना उपचारासाठी खाजगी रुग्णालयात दाखल करण्यात आले होते. उपचार घेत असताना त्यांचा आज पहाटे अडीच वाजता मृत्यू झाला. पोलिसांच्या दबावामुळेच ठाकरे गटाचे पदाधिकारी तिखे यांचा मृत्यू झाला असल्याचा आरोप ठाकरे गटाचे जिल्हाप्रमुख शरद पाटील यांनी केला आहे.