मावशीला हॉस्पिटलला घेऊन जाण्यावरून झालेल्या वादातून लहान भावाकडून मोठ्या भावाचा चाकूने भोसकून खून केल्याची धक्कादायक घटना समोर आली आहे. याबाबत आडगाव पोलिस ठाणे येथे गुन्हा दाखल करण्यात आला आहे.
मावशीला हॉस्पिटलला नेण्यावरुन वाद
काल बुधवारी रोजी दुपारी पावणे तीन वाजेच्या सुमारास सद्भावना पोलीस को.ऑपरेटिव्ह सोसायटी येथे संदीप विजय गायकवाड(वय 33) आणि त्याचा भाऊ अरविंद विजय गायकवाड (वय 30) यांच्या दोघांमध्ये मावशीला हॉस्पिटलला घेऊन जाण्यावरुन वाद झाला. या वादाचं पर्यवसान हाणामारीमध्ये झालं. त्यानंतर चिडलेल्या अरविंद याने संदीप याला किचनमधील चाकू घेऊन दोन ठिकाणी भोसकले ज्यात संदीप गायकवाड याचा मृत्यू झाला आहे. याप्रकरणी नाशिकच्या आडगाव पोलीस ठाणे येथे संदीपचा लहान भाऊ आरोपी अरविंद गायकवाड याच्यावर खुनाचा गुन्हा दाखल करण्यात आला असून त्याला अटक करण्यात आली आहे. संदीप आणि अरविंद यांचे वडील हे नाशिकच्या ग्रामीण पोलीस दलात कार्यरत आहेत. या घटनेनं परिसरात एकच खळबळ उडाली आहे.
21 वर्षीय मुलाचीही विहिरीत आढळली बॉडी
पितृछत्र हरपल्याचे दुःख डोंगराएवढे असते, पण ते दुःख पचवण्याची शक्ती मिळण्यापूर्वीच एका विशीतील तरुणाने जगाचा निरोप घेतल्याची काळीज पिळवटून टाकणारी घटना नाशिकमध्ये घडली आहे. सिडको परिसरातील २१ वर्षीय शुभम बाळासाहेब व्यापारी या तरुणाचा मृतदेह हांडे मळा येथील एका विहिरीत तरंगताना आढळल्याने संपूर्ण शहरात हळहळ व्यक्त केली जात आहे.
मिळालेल्या माहितीनुसार, शुभमचे वडील बाळासाहेब व्यापारी यांचा काही दिवसांपूर्वीच भीषण अपघातात मृत्यू झाला होता. घराचा आधारवड गेल्याने व्यापारी कुटुंब पूर्णपणे कोलमडून पडले होते. वडिलांच्या जाण्याने शुभम प्रचंड मानसिक धक्क्यात आणि तणावात होता. याच नैराश्यातून त्याने टोकाचे पाऊल उचलले असावे, असा प्राथमिक अंदाज वर्तवण्यात येत आहे.
बेपत्ता शुभमचा शोध विहिरीत संपला
वडिलांच्या निधनानंतर अवघ्या काही दिवसांतच शुभम घरातून बेपत्ता झाला होता. कुटुंबीयांनी सर्वत्र शोध घेतला, नातेवाईकांकडे विचारणा केली, मात्र त्याचा कुठेही पत्ता लागला नाही. अशातच १९ जानेवारी रोजी हांडे मळा परिसरातील एका विहिरीत एका तरुणाचा मृतदेह तरंगताना स्थानिकांना दिसला. पोलिसांनी तातडीने घटनास्थळी धाव घेत मृतदेह बाहेर काढला आणि ओळख पटवली असता, तो बेपत्ता शुभम व्यापारी असल्याचे निष्पन्न झाले.