राज्यात सध्या लाडक्या बहिणींचा बोलबोला असून त्याचे प्रतिबिंब महापालिकेच्या उमेदवारीमध्ये उमटले होते. भारतीय जनता पक्षाने यंदाच्या निवडणुकीत ९२ महिला उमेदवारांना स्थान दिले होते. त्यापैकी ६७ महिला निवडून आल्या असून सर्वसाधारण गटातूनही महिलांनी विजय साकारला आहे. विरोधी पक्षांनी दिलेल्या महिला उमेदवारांमधून २० महिलांनी विजयाचा गुलाल उधळला आहे.
विधानसभा निवडणुकीत लाडक्या बहिणींचा मोठा बोलबोला झाला. ‘लाडक्या बहिणीं’मुळे ‘महायुती’चे सरकार राज्यात पुर्नस्थापित झाल्याने महायुतीकडून महिला मतदारांना विशेष प्राधान्य देण्यात येत असल्याचे चित्र सध्या उमेदवारीमध्येही उमटले आहे. पुणे महापालिकेत १६५ नगरसेवकांची संख्या असून त्यामध्ये महिलांसाठी ८३ जागा आरक्षित ठेवण्यात आल्या आहेत. त्यामुळे प्रत्येक पक्षाला सर्व जागांवर उमेदवारी देताना ८३ ठिकाणी महिलांना उमेदवारी देणे बंधनकारक करण्यात आले आहे.
भाजपने सर्वसाधारण गटात चार तसेच अनुसूचित जातीच्या गटात पाच महिला उमेदवारांना निवडणुकीच्या रिंगणात उतरवले होते. या नऊ ठिकाणी पुरूष उमेदवारांना तिकिट देणे शक्य असतानाही महिलांना प्राधान्य देण्यात आले आहे. पल्लवी जावळे, विणा घोष, अर्चना जगताप, संगीता दांगट, रंजना टिळेकर आणि निवेदिता एकबोटे यांना महिला आरक्षण नसलेल्या जागांवर लढत देत विजय साकारला आहे.
महिला मतदारांचा बोलबोला
छत्रपती शिवाजीनगर कॉलनी मॉडेल (प्रभाग १२), वानवडी-साळुंखे विहार (प्रभाग १८), शंकर महाराज मठ-बिबवेवाडी (प्रभाग २०), काशेवाडी-डायसप्लॉट (प्रभाग २२), रविवार पेठ-नाना पेठ (प्रभाग २३), कसबा गणपती-कमला नेहरू हॉस्पिटल-केईएम हॉस्पिटल (प्रभाग २४), शनिवार पेठ-महात्मा फुले मंडई (प्रभाग २५), घोरपडे पेठ-गुरूवार पेठ-समता भूमी (प्रभाग २६), डेक्कन जिमखाना हॅप्पी कॉलनी (प्रभाग २९) या प्रभागांमध्ये पुरूषांपेक्षा महिला मतदारांचे प्रमाण अधिक होते.
महिलांचा प्रभाग
भाजपने कोंढवा बुद्रुक येवलेवाडी या प्रभागात चारही महिलांना उमेदवारी दिली आहे. विधानपरिषदेचे आमदार योगेश टिळेकर यांच्या मातोश्री रंजना टिळेकर या प्रभागातून सर्वसाधारण प्रभागातून लढत आहेत