पनवेल पालिका निवडणुकीत सर्वात श्रीमंत उमेदवाराचा महाविकास आघाडीकडून पराभव झाला आहे. प्रभाग क्रमांक १४ मध्ये भाजपच्या चारही उमेदवारांचा पराभव झाला. मुस्लिम मतदार महाविकास आघाडीच्या बाजूने राहिल्यामुळे श्रीमंत उमेदवार इक्बाल काझी पराभूत झाल्याची चर्चा आहे. पालिका क्षेत्रातील या निकालाकडे सर्वांचे लक्ष लागून राहिले होते.
पनवेल शहर आणि परिसरात भाजपचे ६ उमेदवार बिनविरोध निवडून आल्यामुळे पनवेल शहरातील भाग असलेल्या प्रभाग १४ मध्ये काय होते याकडे सर्वांचे लक्ष होते. भाजपने माजी नगरसेवकाला संधी नाकारून आर्थिक निकषाच्या आधारावर इक्बाल काझी यांना उमेदवारी दिली असे बोलले जात होते.
काँग्रेसकडून काझी यांचे सख्खे मेव्हणे लतीफ शेख यांना उमेदवारी होती. इक्बाल काझी यांनी आपली मालमत्ता १७१ कोटी रुपयांची असल्याचे जाहीर केले होते. त्यामुळे सर्वात श्रीमंत उमेदवार म्हणून या लढतीकडे सर्वांचे लक्ष लागले होते. परंतु या प्रभागातील मुस्लिमबहुल भाग, धाकटा आणि मोठा खांदा ही दोन गावे महाविकास आघाडीच्या बाजूने राहिल्यामुळे आघाडीचे पूर्ण पॅनल विजयी झाले. लतीफ शेख, केतन भगत, मनिषा म्हात्रे आणि आर्या जाधव या महाविकास आघाडीच्या उमेदवारांचा विजय झाला.
काँग्रेसचे शहराध्यक्ष माजी नगरसेवक लतिफ शेख वगळता सर्व उमेदवार नवखे होते. मनिषा म्हात्रे यांनी शेकापमधून भाजपत प्रवेश केलेल्या माजी नगरसेविका सारिका भगत यांचा पराभव केला. भाजपचे इक्बाल काझी आणि आघाडीचे लतीफ शेख यांच्यात ‘कांटे की टक्कर’ होईल असे सांगितले जात होते. नातेवाईक असलेल्या काझी आणि शेख यांच्यात झालेल्या लढतीमुळेच महाविकास आघाडीच्या सर्व उमेदवारांना फायदा झाला.
शेकाप आणि काँग्रेसच्या जुन्या नेत्यांच्या एकीमुळे संपूर्ण प्रभागाला फायदा झाल्याचे चित्र पाहायला मिळाले. विशेष म्हणजे पनवेल शहरात प्रभाग १८, १९ आणि २० मध्ये भाजप आणि भाजप पुरस्कृत ७ उमेदवार बिनविरोध निवडून आले होते. पूर्वीच्या पनवेल नगरपरिषद क्षेत्राचा भाग भाग असलेला प्रभाग १४ आमदार प्रशांत ठाकूर यांच्या पाठिशी उभा राहतो का याबाबत उत्सुकता होती. परंतु, इथल्या मतदारांना भाजपच्या आमदार प्रशांत ठाकूर यांच्या नेतृत्वाला नाकारल्याचेही मतदानाच्या आकडेवारीतून समोर आले आहे.