राज्यातील 29 महानगरपालिकांसाठी आज निवडणूक प्रक्रिया पार पडत असून राजधानी मुंबईतही अनेक उमेदवारांचे भवतिव्य पणाला लागले आहे. मुंबईतील वॉर्ड क्रमांक 2 मध्ये लक्षवेधी लढत रंगत असून या वॉर्डात भाजपकडून तेजस्वी घोसाळकर तर शिवसेना उद्धव बाळासाहेब ठाकरे पक्षाकडून धनश्री कोलगे या निवडणूक रिंगणात आहेत. आज मतदान प्रक्रिया पार पडत असताना तेजस्वी घोसाळकर या आपल्या दिवंगत पती अभिषेक घोसाळकर यांच्या आठवणीने भावूक झाल्याचं पाहायला मिळालं. घरात पूजाअर्चा केल्यानंतर अभिषेक यांच्या फोटोला अभिवादन करताना त्यांना गहिवरून आलं.
मुंबई महापालिकेचेमाजी नगरसेवक अभिषेक घोसाळकर यांची काही महिन्यांपूर्वीच गोळ्या झाडून हत्या झाली होती आणि त्यानंतर तेजस्वी यांनी राजकारणात प्रवेश केला आहे. या निवडणुकीत त्या पहिल्यांदाच एकट्या लढत आहेत, पण अभिषेक यांची साथ त्यांना असल्याची भावना त्यांनी व्यक्त केली. या वॉर्डमधील लढत अत्यंत प्रतिष्ठेची मानली जात असून, तेजस्वी घोसाळकर यांच्या विरोधात ठाकरेंच्या शिवसेनेकडून धनश्री कोलगे उभ्या आहेत.
मतदानाच्या दिवशी, तेजस्वी घोसाळकर यांनी घरातून बाहेर पडण्यापूर्वी पारंपरिक पद्धतीने देवाची पूजा केली. या पूजेनंतर त्यांनी आपल्या पती, अभिषेक घोसाळकर यांच्या फोटोला वंदन केलं. हा क्षण त्यांच्यासाठी अत्यंत भावनिक होता. अभिषेक यांच्या आठवणीने तेजस्वी यांना रडू कोसळलं. यावेळी त्यांना हुंदका आवरणे कठीण झाले.
अभिषेक घोसाळकर यांच्या हत्येनंतर, तेजस्वी यांनी राजकारणात येण्याचा धाडसी निर्णय घेतला. आता त्या मुंबईतील वॉर्ड क्रमांक २ मधून भाजपच्या तिकीटावर निवडणूक लढवत आहेत. हा त्यांच्या राजकीय कारकिर्दीचा एक नवा अध्याय आहे, जो अनेक आव्हानांनी भरलेला आहे.
तेजस्वी घोसाळकर यांची संपत्ती किती?
प्रभाग क्रमांक 2 मध्ये भाजपकडून निवडणूक लढवत असलेल्या तेजस्वी घोसाळकर याआधी शिवसेनेकडून प्रभाग क्रमांक 1 मधून निवडून आल्या होत्या. शिवसेनेतील फुटीनंतर घोसाळकर उद्धव ठाकरेंच्या पक्षात पक्षात होत्या. मात्र निवडणुकीच्या वेळी त्यांनी भाजपचे कमळ हाती घेतले. तेजस्वी घोसाळकर यांनी कम्प्युटर अॅप्लिकेशनमध्ये पदवी प्राप्त केली असून 2017 मध्ये त्यांच्याकडील मालमत्तेची किंमत 25 लाख 82 हजार रुपये होती. आता घोसाळकर यांच्याकडे 5 कोटी 15 लाखांची मालमत्ता असून, 85 लाख 52 हजार रुपयांचे सोने आहे. तसंच तेजस्वी घोसाळकर यांनी अलीकडेच 40 लाख रुपयांची गाडी खरेदी केल्याचं प्रतिज्ञापत्रात नमूद आहे.