धडगाव तालुक्यातील एका आदिवासी शासकीय आश्रमशाळेतील मुख्याध्यापकाने शाळेत शिकणाऱ्या १४ वर्ष आठ महिने वयाच्या विद्यार्थिनीवर लैंगिक अत्याचार केल्याची धक्कडे घटना उघड झाली आहे. वारंवार अत्याचार करून ही गोष्ट बाहेर सांगितली तर जीवे ठार करण्याची धमकी ही विद्यार्थिनीला दिली. या विद्यार्थिनीने घडलेला प्रकार तिच्या आई वडीलांना सांगितल्याने हा प्रकार उघड झाला. याप्रकरणी मुख्याध्यापकासह त्याला मदत करणाऱ्या महिला वॉर्डन विरुद्ध धडगाव पोलीस ठाण्यात बाललैंगिक अत्याचारप्रकरणी गुन्हा दाखल करण्यात आला आहे.
धडगाव तालुक्यातील आदिवासी शासकीय आश्रम शाळा तलाई येथे शिकणाऱ्या 14 वर्षीय 8 महिन्याच्या विद्यार्थिनीवर संशयित मुख्याध्यापक सायसिंग मोवाश्या वसावे याने पीडित विद्यार्थिनीवर जुलै २०२४ ते नोव्हेंबर २०२५ या कालावधीत आश्रमशाळेतील कार्यालय आणि एका गावाजवळील जागेत अत्याचार केले. त्यासाठी त्याला वॉर्डन महिला ही वेळोवेळी काही तरी काम सांगून विद्यार्थिनीला मुख्याध्यापकाच्या केबिनमध्ये पाठवत होती. ही प्रकार बाहेर सांगितल्यास जीवे ठार मारण्याची धमकीही सदर विद्यार्थिनीला देण्यात आली.
वारंवारच्या या प्रकाराने व मुलीला त्रास होऊ लागल्याने तिने सदर बाब तिच्या आई-वडिलांना सांगितल्याने धक्कादायक प्रकार उघडकीस आला. याप्रकरणी विद्यार्थिनीने दिलेल्या फिर्यादीवरून धडगाव पोलीस ठाण्यात मुख्याध्यापक सायसिंग वसावे व वॉर्डन महिला मालती पाडवी यांच्याविरुद्ध बाल लैंगिक अत्याचारान्वये गुन्हा दाखल करण्यात आला आहे. या प्रकरणी पुढील तपास पोलिस उपनिरीक्षक राहुल पाटील करीत आहे. या घटनेमुळे आश्रमशाळा प्रशासनाने गांभिर्याने दखल घेतली आहे. या घटनेची सखोल चौकशी केली जाणार आहे. या घटनेनंतर विविध आदिवासी संघटना आक्रमक झाल्या असून. आदिवासी आश्रम शाळांमधील विद्यार्थिनींचे सुरक्षिततेबाबत प्रश्न उपस्थित होत आहेत.