विरारमध्ये एक धक्कादायक घटना घडली आहे. एका 35 वर्षीय विवाहित महिलेची तिच्याच पतीने आणि नणंदेने मिळून निर्घृण हत्या केल्याचा प्रकार उघडकीस आला आहे. कौटुंबिक वादातून झालेल्या या मारहाणीत महिलेचा जागीच मृत्यू झाला. या प्रकरणी पोलिसांनी पती आणि नणंद दोघांनाही अटक केली आहे.
विरार पश्चिमेकडील एम. बी. ईस्टेट परिसरातील संगम सोसायटीमध्ये कल्पना सोनी (35) ही महिला तिचा पती महेश सोनी (38) आणि कुटुंबासोबत राहत होती. 2025 मध्ये कल्पनाचं लग्न महेश सोनीसोबत झालं होतं. पण लग्नानंतर लगेचच सासरच्या मंडळींकडून तिचा शारीरिक आणि मानसिक छळ सुरू झाला. सतत महिलेला पतीकडून, त्याच्या कुटुंबीयांकडून त्रास दिला जात होता. यामुळे कल्पना आणि तिच्या पतीमध्ये तसंच सासरच्यांमध्ये सतत भांडणं होत होती.
शनिवारी सकाळी कल्पना आणि तिच्या पतीमध्ये पुन्हा वाद झाला. या वादातून कल्पनाने घर सोडून जाण्याचा निर्णय घेतला. तिने पतीकडून तिचं स्त्रीधन परत मागितलं. याच वेळी, पती महेश सोनी आणि नणंद दिपाली सोनी (35) यांनी मिळून कल्पनाला बेदम मारहाण केली. त्यांनी धारदार हत्याराने कल्पनाच्या डोक्यावर आणि कपाळावर वार केले. या हल्ल्यात कल्पनाचा जागीच मृत्यू झाला. कल्पना पती आणि नणंदेला विरोध करण्याआधीच तिला मारहाण करण्यात आली. काही कळायच्या आत दोघांनी मिळून विवाहितेला ठार केलं.
या गंभीर घटनेनंतर बोळींज पोलिसांनी भारतीय न्याय संहितेच्या कलम 103 (1) अन्वये हत्येचा गुन्हा दाखल केला आहे. पोलिसांनी आरोपी पती महेश सोनी आणि नणंद दिपाली सोनी या दोघांना अटक केली असून पुढील तपास सुरू आहे. या घटनेमुळे परिसरात मोठी खळबळ उडाली आहे.