अलीकडे आत्महत्या करण्याचं प्रमाण हे प्रचंड प्रमाणात वाढलं आहे. अशीच एक दुर्दैवी घटना कोकणातील सिंधुदुर्ग जिल्ह्यात समोर आली आहे. 29 वर्षीय विवाहित असलेल्या युवतीने आत्महत्या केल्यानं खळबळ उडाली आहे. कणकवली तळेरे दत्तनगर येथे प्रिती देवेंद्र खटावकर असं या विवाहित महिलेचं नाव आहे.
कणकवली पोलिसांकडून मिळालेल्या माहितीनुसार, राहत्या घराच्या लोखंडी अँगलला गळफास लावून प्रिती यांनी आत्महत्या केली आहे. ही आत्महत्या केल्याची धक्कादायक घटना काल गुरुवारी सकाळी 9.23 वाजण्याच्या सुमारास उघडकीस आली. या घटनेची माहिती मृत विवाहितेचे सासरे रंजन लक्ष्मण खटावकर (वय 64) यांनी कणकवली पोलीस ठाण्यात दिली.
नातीचा आजोबांना फोन
रंजन खटावकर यांना त्यांची नात सानवी हिने फोन करून आईने घराच्या वरच्या मजल्यावरील अँगलला गळफास घेतल्याची माहिती दिली. त्यानंतर त्यांनी तातडीने घराकडे धाव घेऊन पाहणी केली आणि खोलीचा दरवाजा तोडला असता प्रिती खटावकर यांनी गळफास घेतल्याचं भयानक दृश्य दिसलं आणि सगळ्यांच्याच पायाखालची जमीन सरकली. मृतदेह शवविच्छेदनासाठी पाठवण्यात आला आहे. आत्महत्येचं नेमके कारण अद्याप स्पष्ट झालेलं नाही. याप्रकरणी कणकवली पोलीस ठाण्यात आकस्मिक मृत्यूची नोंद करण्यात आली असून पुढील तपास कणकवली पोलीस करत आहेत.
आई दिसेना म्हणून आजीला उठवलं; बाहेर पाहिलं तर…
छोटा मुलगा मध्यरात्री उठला आई दिसेना म्हणून वडिलांच्या मावशीला उठवले. थोड्यावेळाने शोध घेताना घराबाहेर बाथरुममध्ये अर्धवट स्थितीत जळलेला मृतदेह दिसला असल्याची धक्कादायक घटना घडली आहे. घटनेचं कारण अद्याप अस्पष्ट असून हा अपघात की आत्महत्या? याचा तपास देवरूख पोलीस करत आहेत.
देवरुख पोलिसांकडून मिळालेल्या माहितीनुसार, रविवार 21 डिसेंबर रोजी रात्री अक्षरा मोहिते या नेहमीप्रमाणे जेवण करून घरात झोपलेल्या होत्या. दरम्यान, सोमवारी 22 डिसेंबर रोजी पहाटे सव्वाचार वाजण्याच्या सुमारास त्यांचा सात वर्षांचा मुलगा आलोक याला लघवीसाठी जाग आली. त्यावेळी त्याला आई बिछान्यावर दिसली नाही. मुलाने घरातच राहणाऱ्या वडिलांच्या मावशी ताराबाई शिंदे यांना उठवले. ताराबाई आणि आलोक यांनी घरात शोधाशोध केली, पण अक्षरा मिळून आल्या नाहीत. घाबरलेल्या मुलाने आणि ताराबाई यांनी शेजारी राहणारे काका दत्ताराम तुकाराम मोहिते यांना उठवून घडलेला प्रकार सांगितला. त्यानंतर सर्वांनी मिळून पुन्हा शोध घेतला असता, घराबाहेरील बाथरूममध्ये अक्षरा या भाजलेल्या अवस्थेत आढळून आल्या. त्यांना तात्काळ देवरुख ग्रामीण रुग्णालयात दाखल करण्यात आलं. तेथील वैद्यकीय अधिकाऱ्यांनी त्यांना तपासून मृत घोषित केलं.