नाताळ सणाच्या निमित्ताने पुणे कॅम्प परिसरातील महात्मा गांधी रस्त्यावर मोठ्या प्रमाणावर नागरिकांची गर्दी होण्याची शक्यता आहे. त्यामुळे होणारी वाहतूक सुरक्षित व सुरळीत ठेवण्यासाठी शहर वाहतूक पोलिस शाखेने तात्पुरते वाहतूक बदल केले आहेत. या परिसरात नाताळच्या आदल्या दिवशी म्हणजेच २४ डिसेंबर आणि नाताळच्या दिवशी २५ डिसेंबरला सायंकाळी सातपासून गर्दी संपेपर्यंत वाहतूक बदल लागू असणार आहेत.
प्रत्येक वर्षी हजारो नागरिक पुणे आणि परिसरातील भागांमधून कॅम्प परिसरात नाताळच्या आदल्या सायंकाळी आणि नाताळच्या दिवशी दाखल होतात. महात्मा गांधी मार्ग आणि त्याच्या जवळच्या गल्ल्यांमध्ये खाद्य पदार्थांची आणि गिफ्टची दुकाने आहेत. त्यामुळे सर्वे नागरिक येथे उत्सुकतेने येतात.
पर्यायी मार्ग कोणते?
गोळीबार मैदानाकडून महात्मा गांधी रस्त्याकडे जाणारी वाहतूक १५ ऑगस्ट चौक येथे बंद करण्यात येणार आहे. तेथून वाहतूक कुरेशी मशीद व सुजाता मस्तानी चौकाकडे वळवण्यात येईल. इस्कॉन मंदिर चौकाकडून डॉ. बाबासाहेब आंबेडकर पुतळा व अरोरा टॉवरकडे जाणारी वाहतूक बंद ठेवण्यात येणार असून, ती एसबीआय हाउस चौकातून उजवीकडून लष्कर पोलिस ठाण्याकडे सोडण्यात येईल. व्होल्गा चौकातून महंमद रफी चौकाकडे जाणारी वाहतूक बंद करण्यात येणार असून, ती ईस्ट स्ट्रीटने इंदिरा गांधी चौकाकडे वळवण्यात येईल.
इंदिरा गांधी चौकातून महावीर चौकाकडे जाणारी वाहतूक बंद राहील. ही वाहतूक इंदिरा गांधी चौकातून लष्कर पोलिस ठाण्याकडे वळवण्यात येईल. सरबतवाला चौकाकडून महावीर चौकाकडे जाणारी वाहतूक बंद ठेवण्यात येणार असून, ती ताबूत स्ट्रीटमार्गे पुढे सोडण्यात येईल. नाताळच्या पार्श्वभूमीवर नागरिकांनी वाहतूक पोलिसांच्या सूचनांचे पालन करावे, असे आवाहन वाहतूक शाखेकडून करण्यात आले आहे.
शिवाय पुणे वाहतूक पोलिसांनी स्थानिक पोलिस ठाण्यातील आणि वाहतूक नियंत्रण कक्षाकडून काही पथके बनवण्यात येणार आहे. ही पथके कॅम्प आणि इतर परिसरात गर्दी आणि वाहतूकीवर नियंत्रण ठेवतील. तसेच हे वाहतूक बदल आप्तकलीन सेवांसाठी नाहीत हेही त्यांनी स्पष्ट केले.