‘तो परत येईल… एखादा फोन येईल…. कुणीतरी म्हणेल, मी पलाशला पाहिलं आहे… अशा आशेवर सानपाडा सेक्टर ११ येथील पलाश प्रखरचे आई-वडील गेल्या महिनाभरापासून बेपत्ता असलेल्या आपल्या एकुलत्या एक मुलाची वाट पाहत आहेत. बुडणाऱ्या मित्राला वाचवण्यासाठी जीवाची पर्वा न करता समुद्रात उडी घेणारा १९ वर्षीय पलाश अद्याप बेपत्ता असून त्याचा शोध घेण्यासाठी त्याचे संपूर्ण कुटुंब, मित्रमंडळी आणि पोलिस प्रशासन झटत आहे.
नेमकं काय घडलं?
१ नोव्हेंबर रोजी पलाश प्रेम आणि त्याचे तिघे मित्र फिरण्यासाठी अलिबाग येथे गेले होते. गुगल लोकेशनने त्यांना अलिबाग कोर्टाजवळील शांत वाटणाऱ्या किनाऱ्यावर पोहोचवले. मात्र काही वेळातच किनाऱ्यावर प्रचंड लाटा उसळत असताना, शशांक सिंग हा मित्र खोल पाण्यात अडकला. यावेळी शशांकची आर्त हाक ऐकून पलाशने कशाचीही भीती न बाळगता त्याच्या मदतीसाठी थेट समुद्रात उडी घेतली. मात्र, त्यानंतर तो पुन्हा कधी दिसलाच नाही. ३ नोव्हेंबर रोजी शशांकचा मृतदेह मिळाला. मात्र पलाशचा थांगपत्ता लागला नाही.
त्यानंतर पोलिस, कोस्टल गार्ड्स, एनडीआरएफ टीम, तसेच स्थानिक स्वयंसेवकांनी ड्रोन, स्पीडबोटच्या माध्यमातून विस्तृत शोध मोहीम राबवली. परंतु पलाशचा अद्याप शोध लागला नाही. त्यामुळे निराशेच्या सावल्या असूनही आशेचा दिवा बेपत्ता पलाशच्या कुटुंबाच्या मनात तेजाने जळत आहे.
पलाश जीव वाचवायला पाण्यात उतरला होता, त्यामुळे आमचा मुलगा कुठल्या तरी किनाऱ्यावर, कुणाच्या तरी मदतीने सुरक्षित आला असेल, अशी आमची श्रद्धा आहे, आम्ही हार मानणार नाही, असे पलाशचे वडील मुनिंद्र नारायण प्रेम भावनिक होऊन सांगतात.
पलाशच्या कुटुंबीयांनी गेल्या महिनाभरात अनेक वेळा अलिबागला भेट देऊन शोधकार्याचा पाठपुरावा केला आहे. तसेच त्यांनी रत्नागिरी, गोवा, सिंधुदुर्ग, अलिबागसह सर्व किनारी भागांतील पोलीस व स्थानिक मच्छिमारांशी संपर्क साधला आहे.
एनएमआयएमएसमधील एमबीए-टेकचे शिक्षण घेणारा पलाश हा कुटुंबातील एकुलता एक मुलगा होता. त्यामुळे त्याच्या घरातील फोन वाजला की, कुणीतरी पलाशची माहिती देईल अशी आशा त्यांच्या आई वडिलांना वाटते. दरवाजाची बेल वाजल्यास कदाचित पलाशच असेल, या विचाराने त्याची आई थरथरत्या पावलांनी दरवाजा उघडण्यास धावत जाते. पलाशबाबत कुणाला कोणतीही माहिती मिळाल्यास अलिबाग पोलीस ठाण्याशी संपर्क साधावा, असे आवाहन केले आहे.