दुचाकीवरून जात असताना नायलॉन मांजा अडकून तालुक्यातील मुसळगाव ग्रामपंचायतीचे दोन कर्मचारी जखमी झाल्याची घटना गुरुवारी (दि.४) सकाळी १०.१५ वाजेच्या सुमारास घडली.
या घटनेत एकाची डोळ्याची भुवई, तर दुसऱ्याचा हात कापला असून, मोठ्या प्रमाणात रक्तस्त्राव झाला आहे. गेल्या शनिवारीच (दि. २९) सिन्नर शहरात नायलॉन मांजाने युवक गंभीर जखमी झाल्याची घटना घडली होती. आठवडाभरात पुन्हा नायलॉन मांजामुळे दोघेजण जखमी झाल्याची घटना घडल्याने संताप व्यक्त केला जात आहे.
मुसळगाव ग्रामपंचायत कर्मचारी विकी पोपट जाधव (वय ३२) व जयेश खामकर (३०) हे दोघे दुचाकीने गुरेवाडीकडून मुसळगावकडे सकाळी १०.१५ वाजेच्या सुमारास जात असताना त्यांच्या दुचाकीला मांजा अडकला. त्यात विकी जाधव यांच्या डोळ्यावरची भुवई कापली गेली. त्याला बारा टाके घालण्यात आले, तर पाठीमागे बसलेल्या जयेश खामकर याचा डावा हात कापला गेला. नायलॉन मांजाने जखमा झाल्याने दोघांचा मोठ्या प्रमाणात रक्तस्राव झाला. त्यांनी तातडीने उपसरपंच सचिन शिरसाठ यांना घटनेची माहिती दिल्यानंतर ते घटनास्थळी रुग्णवाहिका घेऊन दाखल झाले. दोघांना उपचारासाठी सिन्नर येथील डॉ. चव्हाणके रुग्णालयात दाखल करण्यात आले होते. दोघांवर उपचार केल्यानंतर त्यांना घरी सोडून देण्यात आले.
वाढत्या घटनांमुळे संताप
गेल्या शनिवारी संगमनेर नाका परिसरात एका युवकाच्या दुचाकीला मांजा अडकून तो गंभीर जखमी होऊन त्याला सुमारे ८० टक्के पडले होते. त्यानंतर दुसऱ्या दिवशी सिन्नर पोलिस व नगरपरिषदेच्या पथकाने विविध ठिकाणी छापे टाकले होते. त्यात सुमारे साडेदहा लाख रुपयांचा नायलॉन मांजा जप्त करण्यात आला होता. याप्रकरणी सिन्नर पोलिस ठाण्यात गुन्हाही नोंदविण्यात आला होता.