नांदेडमध्ये एक धक्कादायक प्रकरण समोर आलं आहे. प्रेम प्रकरणातून एका 25 वर्षीय तरुणाची मुलीच्या बापाने आणि भावाने निर्घृणपणे हत्या केल्याची धक्कादायक घटना काल गुरुवारी सायंकाळी नांदेड शहरात घडली आहे. आरोपींनी तरुणाचा पाठलाग केला, त्यानंतर गोळीबार करून डोक्यात फरशी घालून त्याची हत्या केली. सक्षम गौतम ताटे असं मयताचं नाव आहे. विशेष म्हणजे मयत आणि मुलीचा भाऊ दोघेही मित्र असून दोघांवरही गंभीर स्वरूपाचे गुन्हे दाखल आहेत. इतवारा पोलिसांनी दोघांना बापाला आणि मुलाला अटक केली असून भरवस्तीत घडलेल्या या हत्याकांडाच्या घटनेनं खळबळ उडाली आहे.
‘माझ्या मुलीला पुन्हा बोलल्यास…’
मयत सक्षम ताटे याचं अल्पवयीन मित्र असलेल्या आरोपीच्या बहिणीसोबत प्रेम प्रकरण सुरु होतं. ही बाब समजल्यानंतर मुलीचे वडील गजानन मामीलवार आणि भावाने त्याची समजूत काढली. ‘माझ्या मुलीला पुन्हा बोलल्यास जीवे मारण्याची धमकी दिली होती’, असा आरोप मयताच्या नातेवाईकांनी केलाय. पण त्यानंतरही प्रेमप्रकरण सुरूच असल्याने गुरुवारी सक्षम ताटे याला आरोपींनी जुना गंज भागातील पैलवान टी हाऊस परिसरात सायंकाळी 5.20 वाजताच्या सुमारास बोलावले. यावेळी त्यांच्यात वाद झाला. वाद विकोपाला गेल्यानं संशयित आरोपी गजानन मामीलवाड, साहिल गजानन मामीलवाड व अन्य तिघांनी सक्षम ताटे याला मारहाण केली. तिथून पळ काढल्यानंतर त्याच्या दिशेने गोळीबार केला, मात्र गोळी कोणाला ही लागली नाही. त्यानंतर त्याच्या डोक्यात फरशी घालून त्याची हत्या केली.
बाप आणि मुलाला घेतलं ताब्यात
संशयित आरोपी गजानन मामीलवाड हा मकोकाच्या कारवाईमधून सुटून बाहेर आला होता. घटनेची माहिती मिळताच पोलीस अधीक्षक अबिनाश कुमार यांच्यासह इतवारा पोलीस ठाण्याचे पोलीस अधिकारी आणि डिबीच्या कर्मचाऱ्यांनी घटनास्थळी धाव घेतली. फरार झालेल्या आरोपीची शोध मोहीम घेऊन पोलिसांनी मुलीचा बाप, दोन्ही भाऊ आणि इतर दोघांना ताब्यात घेतल्याची माहिती आहे.
आईच्या तक्रारीवरून गुन्हा दाखल
दरम्यान, मयत याच्यावर अनेक गुन्हे दाखल होते. तो पिस्तूल बाळगत असल्याची माहिती पोलिसांना मिळाली होती. पोलिसांनी कोम्बिंग ऑपरेशन दरम्यान चारवेळा त्याच्या घराची झडती घेतली होती. मात्र, पोलिसांना पिस्तूल काही आढळून आली नाही. दरम्यान, रात्री उशिरा मयताच्या आईच्या तक्रारीवरून इतवारा पोलीस ठाण्यात आरोपी विरोधात हत्येचा आणि ॲट्रॉसिटीचा गुन्हा दाखल करण्यात आला आहे.