लग्नाच्या आमिषाने अल्पवयीन मुलीला पळवून नेणाऱ्या तरुणाचा महिनाभर पुणे- हैदराबाद- उत्तर प्रदेश असा पाठलाग करून फुरसुंगी पोलिसांनी शोध लावला. मुलीची सुखरूप सुटका केली असून, आरोपी तरुण आणि त्याच्या सावत्र आईला अटक करण्यात आली आहे.
रमेश मसनाजी पिट्टलवाड (वय २५, रा. धगनगर वस्ती, उरुळी देवाची, मूळ रा. नांदेड) आणि मुक्ताबाई मसनाजी पिट्टलवाड (३५, रा. साखरे वस्ती, हिंजवडी) अशी दोघांची नावे असून, त्यांच्या विरोधात फुरसुंगी पोलिस ठाण्यात गुन्हा दाखल करण्यात आला आहे.
काय आहे नेमकं प्रकरण?
पोलिसांनी दिलेल्या माहितीनुसार, पुण्यात राहत असताना रमेशची १३ वर्षीय मुलीसोबत ओळख झाली होती. त्याने लग्नाचे आमिष दाखवून तिला पळवून नेले. या कृत्यात त्याची सावत्र आई मुक्ताबाई हिने मदत केली. तिने ‘हैदराबादच्या नातेवाइकांकडे जा,’ असे रमेशला सांगून प्रवास खर्चासाठी पैसेही दिले. त्यानुसार रमेश आणि मुलगी रेल्वेने हैदराबादला गेले.
दोघे हैदराबादला गेल्याची कबुली
मुलगी बेपत्ता झाल्याची तक्रार कुटुंबीयांनी फुरसुंगी पोलिसांकडे केली. पोलिसांनी तत्काळ अपहरणाचा गुन्हा दाखल करून तपास सुरू केला. रमेश हैदराबादमध्ये असल्याची माहिती मिळाल्याने पोलिसांनी मुक्ताबाईला ताब्यात घेऊन चौकशी केली. तिने दोघे हैदराबादला गेल्याची कबुली दिली. मात्र, पोलिस पोहोचण्यापूर्वीच रमेश मुलीसह तेथून पसार झाला होता.
तांत्रिक विश्लेषण आणि बातमीदारांच्या माहितीच्या आधारे उत्तर प्रदेशातील बामणौली (ता. बडोत, बागपत) येथे रमेश असल्याचे समोर आले. वरिष्ठ निरीक्षक अमोल मोरे आणि गुन्हे निरीक्षक राजेश खांडे यांच्या मार्गदर्शनाखाली सहायक पोलिस निरीक्षक नानासाहेब जाधव यांच्या पथकाने उत्तर प्रदेशात धाव घेतली.
स्थानिक पोलिसांच्या मदतीने चार दिवस शोधमोहीम राबवून रमेशला पकडले. मावशीकडे राहणाऱ्या आरोपीला ताब्यात घेऊन पुण्यात आणले आणि मुलीची सुटका केली. रमेश १८ ऑक्टोबरला मुलीला घेऊन बेपत्ता झाला होता. पोलिस उपायुक्त डॉ. राजकुमार शिंदे यांच्या मार्गदर्शनाखाली ही कारवाई झाली.