सासरच्यांवर छळाचा आरोप करणारी सहा पानांची ‘सुसाइड नोट’ लिहून नाशिक जिल्ह्यातील पंचवटी परिसरात विवाहित महिलेने आत्महत्या केल्याची धक्कादायक घटना समोर आली आहे. नेहा संतोष पवार (वय २७, रा. हिरावाडी) असे मृत महिलेचे नाव आहे. या प्रकरणी अकस्मात मृत्यू नोंद असून, रात्री उशिरापर्यंत गुन्हा नोंदविण्याचे काम पंचवटी पोलिसांत सुरू होते.
पोलिसांनी दिलेल्या माहितीनुसार, बुधवारी (दि. २६) दुपारी एक वाजताच्या सुमारास नेहा यांनी राहत्या घरी विषारी औषधाचे सेवन केल्याने पतीने खासगी रुग्णालयात दाखल केले. सायंकाळी पावणेपाच वाजता वैद्यकीय अधिकाऱ्यांनी त्यांना मृत घोषित करून पोलिसांना कळवले. नेहा यांनी पोलिसांना उद्देशून ‘सुसाइड नोट’ लिहिली आहे.
सुसाइड नोट’मध्ये काय?
‘माझे नाव नेहा बापू डावरे उर्फ नेहा संतोष पवार असून, माझे लग्न ४ जून २०२५ रोजी रेशीमबंध बँक्वेट हॉलमध्ये झाले. १० मार्चला सुपारी फोडल्यावेळी माझ्या सासरच्यांनी म्हटले की, हुंडाप्रथा बंद आहे. तरी तुम्ही नवरदेवास त्याच्या अटी-शर्तीनुसार सोने, चांदी, पाच भांडे द्या. त्यानुसार माझ्या माहेरच्यांनी धुमधडाक्यात लग्न लावून दिले. लग्नानंतर सासरचे भांडण करीत नाही पण, मानसिक त्रास देतात.’ असे विवाहितेने चिठ्ठीत लिहिले आहे.
‘मोबाइलवर सारखी बोलते, घरकाम येत नाही, पतीला उलटसुलट सांगते. सिलिंडर टाकी एक महिन्यातच संपते. पतीचे लग्नाआधीपासून एका युवतीसोबत प्रेमसंबंध असून, पतीने तिला दोघांचे अश्लील फोटो दाखवले होते. सासरची आर्थिक परिस्थिती नाजूक असल्याने आणि सासरचे लोक पैशांची मागणी करू लागल्याने माहेरहून २० हजार रुपये आणून दिले. दिवाळीसाठी १५ दिवस माहेरी पाठवले. मात्र, दहाव्या दिवशी सासू व पतीने सासरी येण्यास सांगितले. नियमित मासिक पाळी येत नसल्याने सासरच्या लोकांनी त्रास दिला. भाऊ सासरच्या लोकांना मी लिहिलेली चिठ्ठी सापडली तर ते गायब करतील, म्हणून चिठ्ठीचे फोटो काढून सगळ्यांना पाठवत आहे. माझे नशीब खराब असून, मला सासर चांगले मिळाले नाही. म्हणून मी आत्महत्या करीत आहे’, असे चिठ्ठीत लिहिले आहे.