दुचाकीचा धक्का लागल्याच्या कारणाने एका तरुणाने दाम्पत्याला मारहाण केल्याची घटना पुण्यातील वारजे परिसरात घडली. या वेळी झालेल्या झटापटीदरम्यान दाम्पत्याचे नऊ लाख रुपये किमतीचे सोन्याचे दागिने मारहाण करणाऱ्याने चोरून नेले. मात्र, या प्रकरणी तक्रार देण्यासाठी गेलेल्या पीडित दाम्पत्याला पोलिसांनी दुपारी एक वाजल्यापासून रात्री आठ वाजेपर्यंत पोलिस ठाण्यात बसवून ठेवले आणि गुन्हा दाखल न करता घरचा रस्ता दाखवला.
या प्रकरणी महेश अण्णासाहेब पोळ (वय ३५, रा. ओंकार कॉलनी, वारजे माळवाडी ) यांनी वारजे माळवाडी पोलिस ठाण्यात तक्रार अर्ज दिला आहे. २४ नोव्हेंबरला सकाळी सव्वाअकरा वाजताच्या सुमारास ते, त्यांची पत्नी आणि मुलगी दुचाकीने कर्वेनगर पुलाकडे जात होते. त्या वेळी विरुद्ध दिशेने दुचाकीवरून तरुण येत होता. त्याच्या दुचाकीचे हँडल पोळ यांच्या गाडीला लागले.
त्यामुळे ‘अक्कल आहे का?’ असे पोळ म्हणाले. तेव्हा तरुण संतापाने खाली उतरला; त्याने पोळ यांची दुचाकी ढकलली. त्यामुळे तिघेही रस्त्यावर पडले. पोळ तरुणाजवळ गेले असता तरुणाने त्यांच्यासोबत झटापट केली. तरुणाने त्यांच्या गळ्याची गचांडी पकडल्याने पोळ यांच्या गळ्यातील १११.३५ ग्रॅम वजनाची सुमारे आठ लाख रुपये किमतीची सोन्याची साखळी तुटून खाली पडली. त्या तरुणाने पोळ यांच्या पत्नीलाही मारहाण केली. नागरिकांचा जमाव आल्याने मारहाण
तरुणाकडून मारहाण झालेल्या दाम्पत्याने तातडीने वारजे माळवाडी पोलिस ठाण्यात धाव घेऊन घडलेला प्रकार सांगितला. मात्र, सुरुवातीला त्यांचा तक्रार अर्ज स्वीकारला नाही. रात्री आठपर्यंत ते पोलिस ठाण्यातच थांबून होते. त्या वेळी त्यांचा फक्त तक्रार अर्ज घेतला गेला. गुन्हा दाखल करण्याची प्रक्रिया सोमवारी झाली नाही. वारजे माळवाडी पोलिसांनी मंगळवारी पोळ यांच्याशी संपर्क साधून बुधवारी बोलावले असल्याचे पोळ यांनी सांगितले.
ट्रकचालकाला लुटले
दुसरीकडे, हडपसरच्या मगरपट्टा साउथ गेटजवळ ट्रक चालकाला अपघाताचा बनाव करून लुटले. या प्रकरणी हडपसर पोलिस ठाण्यात गुन्हा दाखल केला असून, एका आरोपीला अटक केली आहे. या प्रकरणात साधुराम मुळे (वय ३३, रा. तुळजापूर) यांनी तक्रार दिली आहे. त्यावरून इरफान इस्माइल सय्यद (वय ३३, रा. माळवाडी, हडपसर) याच्यासह आणखी दोन साथीदारांवर गुन्हा दाखल करण्यात आला आहे.
तक्रारदार ट्रक घेऊन जात असताना २४ नोव्हेंबरला मध्यरात्री मगरपट्टा रस्त्यावर ही घटना घडली. आरोपींनी अपघाताचा खोटा दावा करून ट्रक बाजूला घेण्यास सांगितले. तक्रारदाराच्या भावाला आरोपींनी शिवीगाळ करून मारहाण केली. आरोपींनी तक्रारदाराच्या पँटच्या खिशातून पाच हजार रुपये जबरदस्तीने काढून घेतले.