उतारवयात आधाराची गरज असलेल्या वयोवृद्ध महिलेला शिळेपाके-आंबट अन्न देऊन तिला घरातून निघून जाण्यास सांगण्यात आले. असं सांगणाऱ्या सुनेला व मुलाला पुणे न्यायालयाने प्रत्येकी दोन लाख रुपयांची भरपाई देण्याचे आदेश दिले आहेत. वयाची ऐंशी वर्षे ओलांडलेल्या या महिलेला घरात राहण्याचा हक्क असून, तिला घरातून बाहेर काढण्यासही न्यायालयाने मनाई केली आहे; त्यामुळे वृद्धांना मानसिक त्रास देणे किंवा त्यांच्या मूलभूत गरजांकडे दुर्लक्ष करणे, हा ‘कौटुंबिक हिंसाचार’च असल्याचे अधोरेखित झाले आहे. या घटनेने पुन्हा एकदा वृद्धांबाबतचा प्रश्न ऐरणीवर आला आहे.
या प्रकरणाच्या खटल्याच्या सुनावणीवेळी, ‘सून व मुलाने वृद्ध महिलेवर कौटुंबिक हिंसाचार केला आहे. वृद्धेस मानसिक छळ सोसावा लागल्यामुळे तिला नुकसानभरपाई मिळणे आवश्यक आहे,’ असे नमूद करून पुण्याच्या प्रथमवर्ग न्यायदंडाधिकारी अमोल शिंदे यांनी हा निकाल दिला आहे. त्याशिवाय, मुलगा, सून व तिच्या नातेवाइकांनी ज्येष्ठ महिलेला कोणत्याही प्रकारे त्रास देऊ नये; तसेच त्यांना घरातून बेदखल करू नये, असे स्पष्ट निर्देशही न्यायालयाने दिले आहेत. त्यामुळे सून आणि मुलाला चांगलाच धडा मिळाला आहे.
या प्रकरणी कुसुम (वय ८०) यांनी मुलगा सारंग आणि सून मनीषा (सर्वांची नावे बदलली आहेत) यांच्याविरोधात कौटुंबिक हिंसाचारापासून महिलांचे संरक्षण कायद्यांतर्गत न्यायालयात तक्रार केली होती. त्यांच्या वतीने ॲड. स्मिता देशमुख यांनी बाजू मांडली होती. तक्रारदारांचा मुलगा कंपनीत उच्चपदस्थ अधिकारी, तर सून बँकेत नोकरी करत आहे. तरी, सून घरात मोलकरणीसारखं राबविते, यासह विविध आरोप ज्येष्ठ महिलेने केले होते. सुनेने या अर्जाला विरोध करून तो फेटाळण्याची मागणी केली होती. मात्र, सासूची उलटतपासणी घेतली नाही; त्यामुळे कौटुंबिक हिंसाचाराचे आरोप खरे असल्याचा निर्वाळा देऊन न्यायालयाने महिलेच्या बाजूने निकाल दिला आहे. या प्रकरणी न्यायालयाच्या आदेशानुसार, सून आणि मुलाने प्रत्येकी या वृद्ध महिलेला दोन लाख रुपये देण्याचे आदेश देण्यात आले आहेत.