वडिलांनी त्यांच्या ओळखीच्या महिलेशी जवळीक साधली. वडिलांची प्रेयसी ही थेट घरात येऊन आईला त्रास देत होती. या त्रासाला कंटाळून आईने आत्महत्या केली, असा आरोप मुलाने केला आहे. या प्रकरणात सरला वाणी (रा. झेंडी गेट, कुरेशी मोहल्ला बस स्थानकासमोर, अहिल्यानगर) यांच्या विरोधात बेगमपुरा पोलिस ठाण्यात गुन्हा दाखल करण्यात आला आहे.
या प्रकरणी रूपेश गजानन सपकाळ (वय २५, रा. एन १३, वानखेडेनगर) यांनी दिलेल्या तक्रारीनुसार, १७ नोव्हेंबर २०२५ रोजी २ वाजेच्यादरम्यान रूपेश सपकाळ यांची आई अनिता गजानन सपकाळ यांनी राहत्या घरी दोरीने गळफास घेतला होता.
काय आहे प्रकरण?
रूपेश सपकाळ यांचे वडील हे चार वर्षापूर्वी चार धाम यात्रेसाठी गाडी चालवत होते. या यात्रेच्या दरम्यान रूपेशच्या वडिलांची ओळख सरला वाणी हिच्याशी झाली. सरला वाणी व वडील गजानन सपकाळ यांच्यातील मैत्रीचे रूपांतर प्रेमात झाले. ही घटना समजल्यानंतर रूपेश याच्या आई अनिता सपकाळ यांनी पतीची समजूत काढण्याचा प्रयत्न केला. मात्र तरीही सरला वाणी आणि रूपेशच्या वडिलांमध्ये तासनतास मोबाईलवरून चर्चा होत असे.
एक दिवस सरला वाणी या घरी आल्या. यावेळी रूपेशच्या आईने सरला वाणी हिलाही तू त्यांच्याशी बोलू नको. मर्यादा बस झाली. असेही सांगितले. यानंतर हे प्रकरण वाढत गेले. या दोघांमध्ये अनैतिक संबंध येऊ लागले. सदर महिला ही बिनधास्त घरी यायली लागली. यामुळे रूपेशची आई ही मानसिक तणावातून जाऊ लागली.
रूपेशच्या आईने या संबंधाचा तसेच ती महिला घरी येण्यास विरोध केला असता, तिने सांगितले की, ते आता माझे पती आहे. तू आता राहू नको, तू एकतर घरातून निघून जा नाही तर तुझ्या जीवाचे बरेवाईट करून घे, असे सांगत तिचा छळ केल्याचा आरोप मुलाने केला आहे. सरला वाणी हिचा त्रास सहन न झाल्याने रुपेशच्या आईने १७ नोव्हेंबर २०२५ राहत्या घरी आत्महत्या केली.
या प्रकरणी रूपेश गजानन सपकाळ यांच्या तक्रारीवरून तिच्या आईचा छळ करून तिला आत्महत्येसाठी प्रवृत्त करणाऱ्या सरला वाणी हिच्या विरोधात बेगमपुरा पोलिस ठाण्यात गुन्हा दाखल करण्यात आला आहे. या प्रकरणाचा तपास पोलिस उपनिरीक्षक कोळेकर यांच्याकडे देण्यात आला आहे.