पुणे पोलिसांच्या एका कारवाईचं सध्या सर्वत्र कौतुक होताना दिसत आहे. त्याचं कारण म्हणजे सामान्य पुणेकरांना आणि दिवसाढवळ्या आणि रात्रीसुद्धा छळणाऱ्या, नाहक त्रास देणाऱ्या गुंडांवर पोलिसांनी आता जबरदस्त कारवाई केली आहे. ही कारवाई थेट नागरिकांसमोर केली आहे. या कारवाईचा व्हिडिओही सध्या प्रचंड व्हायरल होत आहे. फुरसुंगी-आदर्श नगर परिसरात वाहनांची तोडफोड करून दहशत माजवणाऱ्या कोयता गँगच्या सदस्यांवर पुणे पोलिसांनी अक्षरशः धडक कारवाई केली. नागरिकांच्या घराबाहेर उभी असलेली तब्बल २० ते २५ वाहने फोडून या टोळक्याने शनिवारी उशिरा रात्री परिसरात भीतीचं वातावरण निर्माण केलं होतं. मात्र घटनेनंतर काही तासांतच पोलिसांनी आरोपींना जेरबंद करत सर्वांसमोर उदाहरण घालून दिलं.
सीसीटीव्ही फुटेजमध्ये आरोपी हातात धारदार कोयते घेऊन घोषणा देत गाड्या, रिक्षा आणि इतर वाहनांची बेछूट तोडफोड करताना स्पष्ट दिसत होते. हीच दहशत नागरिकांसमोर निर्माण झाली असताना, पोलिसांनी पकडलेल्या आरोपींना नेमकं त्याच ठिकाणी आणून कठोर शिक्षा दिली. टायरमध्ये घालून, गुडघ्यावर चालायला लावून आणि बेल्टने चोप देत पोलिसांनी या गुंडांची धिंड काढली. ‘आवाज येतोय का…?’ अशा शब्दांत पोलिसांना दिलेला कडक संदेश परिसरात घुमला.
फुरसुंगी-आदर्श नगर भागात मागील काही दिवसांपासून वाढणाऱ्या गुंडगिरीला थोपवण्यासाठी ही कारवाई निर्णायक ठरली. सार्वजनिक ठिकाणीच केलेल्या शिक्षा कारवाईचा उद्देश गुंडांना मानसिक रोख लावण्याचा होता, असा पोलिसांचा स्पष्ट संदेश आहे. पुण्यात कोणत्याही प्रकारची हुल्लडबाजी किंवा दहशत सहन केली जाणार नाही, हे दाखवून देण्यासाठीच आरोपींना नागरिकांसमोर फिरवण्यात आलं. सिनिअर पीआय अमोल मोरे यांच्या नेतृत्वात ही कारवाई करण्यात आली.
या घटनेनंतर दहशतीत असलेल्या रहिवाशांनी सुटकेचा निश्वास टाकला असून पोलिसांच्या तत्परतेचं जोरदार कौतुक होत आहे. रात्रीच्या वेळी अचानक झालेल्या तोडफोडीनं घाबरलेल्या नागरिकांना पोलिसांच्या या धडक कारवाईनं मोठा दिलासा दिला आहे. पुण्यात गुंडगिरीला पायबंद घालण्यासाठी अशा कारवाया गरजेच्या असल्याचं नागरिकांचं मत आहे.