24 वर्षीय तरुणाने विष प्राशन करून आत्महत्या केल्याची धक्कादायक घटना कोल्हापुरात करवीर तालुक्यातील सांगरुळ येथे समोर आली आहे. विक्रमनगर औद्योगिक भागातील कंपनीच्या सुपरवायझरने त्याच्यावर मोबाईल चोरीचा आळ घेऊन अपमानकारक वागणूक दिली होती. या नैराश्यातून तरुणाने टोकाचे पाऊल उचलल्याचा आरोप केला जात आहे. मृत तरुणाचे नाव रोहित ऊर्फ कुमार आनंदा कांबळे (वय 24) असे असून सोमवारी सकाळी सीपीआर रुग्णालयात उपचार सुरू असताना त्याचा मृत्यू झाला.
या घटनेनंतर रोहितचे नातेवाईक आणि रिपब्लिकन पक्षाच्या कार्यकर्त्यांनी सीपीआरसमोर ठिय्या मारत संबंधित आरोपीवर गुन्हा दाखल करण्याची मागणी केली. शेवटी सुपरवायझरवर गुन्हा दाखल करण्यात आला आहे.
पोलिसांनी दिलेल्या माहितीनुसार, रोहित कांबळे हा शिवाजी उद्यमनगर येथील एका कारखान्यात ऑप्टीगामा कंपनीमार्फत कॉन्ट्रॅक्ट बेसवर मशीन ऑपरेटर म्हणून गेल्या सहा वर्षांपासून कार्यरत होता. १० ऑक्टोबर रोजी मध्यरात्रीच्या शिफ्ट दरम्यान सुपरवायझर विकास शंकर डोंगळे (वय ४०, रा. घोटवडे, ता. राधानगरी) याने त्याच्यावर कंपनीतील मोबाईल चोरीचा आरोप करत जाब विचारला. त्यानंतर रोहितला कामावरून कमी करण्यात आले. तसेच अपमानास्पद शब्दांत बोलण्यात आल्याचे फिर्यादी अक्षय भगवान कांबळे यांनी तक्रारीत नमूद केले आहे. या धक्क्याने नैराश्यात गेलेल्या रोहितने 21 नोव्हेंबर रोजी दुपारी शेतात कीटकनाशक प्राशन केले होते.
रुग्णालयाबाहेर तणावपूर्ण वातावरण
प्रकृती खालावल्यानंतर रोहितला शासकीय रुग्णालयात दाखल करण्यात आले, परंतु उपचारादरम्यान सोमवारी सकाळी साडेनऊ वाजता त्याचा मृत्यू झाला. मृत्यूची बातमी समजताच नातेवाईक, ग्रामस्थ आणि रिपब्लिकन पक्षाचे पदाधिकारी मोठ्या संख्येने सीपीआर रुग्णालयासमोर जमले होते. दोषीवर कारवाईची मागणी करत त्यांनी मृतदेह ताब्यात घेण्यास नकार दिला. यावेळी घोषणाबाजी आणि ठिय्यामुळे रुग्णालय परिसरात तणाव निर्माण झाला होते.
पोलिसांची मध्यस्थी आणि गुन्हा दाखल
या घटनेचे गांभीर्य लक्षात घेऊन करवीर पोलिसांनी घटनास्थळी पोहोचून नातेवाईकांशी चर्चा केली. त्यानंतर सुपरवायझर विकास डोंगळे याच्याविरुद्ध सदोष मनुष्यवधाचा गुन्हा दाखल करण्यात आल्याची माहिती पोलिस निरीक्षक किशोर शिंदे यांनी दिली. गुन्हा दाखल झाल्यानंतर संतप्त जमाव शांत झाला आणि कुटुंबीयांनी मृतदेह स्वीकारला.
समाजात संताप, तपास सुरु
या घटनेने परिसरात आणि कामगारांमध्ये संतापाचे वातावरण आहे. स्थानिक नागरिकांनी अन्याय झालेल्या कामगारांना न्याय देण्यासाठी सखोल तपास आणि कठोर कारवाई करण्याची मागणी करण्यात आली आहे. दरम्यान, या प्रकरणी करवीर पोलिस अधिक तपास करत असून आरोपी सुपरवायझरचा शोध सुरू असल्याचेही पोलिसांनी सांगितले.