मुंबई – गोवा राष्ट्रीय महामार्गावर रायगड जिल्ह्यातील पोलादपूर तालुक्यात सोमवारी (24 नोव्हेंबर 2025) एक भीषण अपघात झाला. पहाटे घनदाट धुक्यामुळे हा भीषण अपघात झाल्याची माहिती आहे. पुण्याहून खेडच्या दिशेने प्रवास करणारी खासगी ट्रॅव्हलर बस भोगाव गावाजवळील पुलाजवळ बॅरिकेडला धडकली, त्यानंतर ही खासगी ट्रॅव्हलर बस थेट 45 ते 50 फूट खोल दरीत कोसळली. या दुर्घटनेत 22 प्रवासी जखमी झाले असून त्यापैकी 10 प्रवाशांची प्रकृती गंभीर असल्याची माहिती आहे.
पुण्याहून खेडच्या दिशेने प्रवास करणारी खासगी ट्रॅव्हलर बस भोगाव गावाजवळ आली असता महामार्गाचा एक लेन सुरू असलेल्या दुरुस्तीच्या कामामुळे बंद ठेवण्यात आला होता. पहाटे अत्यंत घनदाट धुके असल्याने बॅरिकेड चालकाच्या नजरेस पडलेच नाही. वाहनाने बॅरिकेडला जोरदार धडक दिली आणि क्षणातच बस 45 ते 50 फूट खोल दरीत कोसळली. अपघाताचा आवाज येताच परिसरातील नागरिकांनी तातडीने घटनास्थळी धाव घेत बचावकार्य सुरू केले.
दरम्यान, पोलादपूर पोलिस, महामार्ग सुरक्षा पथक आणि स्थानिक बचाव पथकाने मिळून जखमी प्रवाशांना वर काढण्यासाठी सुमारे तासभर प्रयत्न चालवले. अनेक जखमी प्रवासी दरीतील अवघड उतारात अडकले होते. स्थानिकांनी दाखवलेल्या तत्परतेमुळे अनेकांचे प्राण वाचल्याचे प्रत्यक्षदर्शींनी सांगितले.
जखमींना खेड तालुक्यातील कळंबनी उपजिल्हा रुग्णालयात तत्काळ दाखल करण्यात आले. शमल अंजर्लेकर, काजल शिगवण, दिलीप मोहिते, अमरनाथ कांबळे, दिपाली नाचरे, प्रतीक आणि प्रिया गुरव, आळंदी नाचरे, सर्वेश गुहागरकर व मयुरी शिगवण अशी गंभीर जखमी प्रवाशांची नावे आहेत. इतर दहापेक्षा अधिक प्रवाशांना अधिक उपचारांसाठी चिपळूणमधील खासगी रुग्णालये आणि डेरवण येथील रुग्णालयात हलवण्यात आले आहे.
अपघातानंतर महामार्गावर मोठ्या प्रमाणात वाहतूक कोंडी निर्माण झाली. पहाटेचा वेळ असल्याने अनेक वाहनचालकांना अडचणींचा सामना करावा लागला. महामार्ग पोलिसांनी तातडीने पथके तैनात करून वाहतूक सुरळीत केली.
धुके, रस्त्याचे चालू काम, आणि बॅरिकेडिंगमधील त्रुटी हे या अपघाताचे संभाव्य कारण असल्याचे पोलिसांनी सांगितले आहे. विशेषतः महामार्गावर बॅरिकेड्स नीट न दिसणे आणि रात्री लाइटिंगची सुविधा नसणे ही गंभीर कमतरता असल्याचे स्थानिक नागरिकांनीही अधोरेखित केले.
या अपघातामुळे पुन्हा एकदा महामार्गावरील कामाच्या वेळी सुरक्षाविषयक उपाययोजनांची अपरिहार्यता अधोरेखित झाली आहे. अनेकांनी प्रशासनाकडे अपुरी सूचना फलक, अस्पष्ट बॅरिकेडिंग आणि कमकुवत विजव्यवस्थेबाबत नाराजी व्यक्त केली आहे. पुढील तपास पोलादपूर पोलीस करत आहेत.
अपघातातून जीव वाचलेले काही प्रवासी हादरलेले असून, “धुक्याने वेढलेल्या रस्त्यावर काहीच दिसत नव्हते. अचानक जोरदार धक्का बसला आणि आम्ही दरीत कोसळत गेलो,” असे एका प्रवाशाने सांगितले.
ही भीषण दुर्घटना पुन्हा एकदा महामार्गावरील सुरक्षिततेच्या नियमांचे पालन आणि दुरुस्तीच्या कामातील दक्षतेची गरज अधोरेखित करते. पुढील काही दिवसात प्रशासन कोणती कार्यवाही करते याकडे सर्वांचे लक्ष लागले आहे.