शहंरामधील गुन्हेगारी हा प्रश्न गंभीर बनत चालला आहे. स्वयंघोषित भाईंची संख्या वाढतेच आहे. या गुंडांना ना कायद्याची भीती आहे ना ते कोणत्या नियमांना जुमानतात. त्यांची अरेरावी आणि गुंडगिरी सामान्य माणसांना नाहक त्रास देणारी ठरते. दरम्यान, पुण्यातही काही दिवसांपूर्वी कोयता गँगचं भयानक टोळीयुद्ध सुरु झाल्याचं पाहायला मिळालं आहे. या टोळीयुद्धाने आतापर्यंत दोघांचा क्रूर पद्धतीने जीव घेतला आहे. असाच प्रकार आता अंबरानाथमध्येही घडला आहे.
अंबरनाथ शहर हादरलं आहे. शहारमध्ये कोयता गँगने एका तरुणावर प्राणघातक हल्ला केला आहे. हा साधा हल्ला नव्हता तर कोयता आणि इतर धारदार शस्त्रांनी त्यांनी हा हल्ला चढवला आहे. त्यामुळे अंबरनाथमध्ये कायदा सुव्यवस्थेचा प्रश्न ऐरणीवर आला आहे. या हल्ल्यामध्ये गंभीर जखमी असलेल्या तरुणावर रुग्णालयामध्ये उपचार सुरु आहेत. या हल्ल्याचे भीषण सीसीटीव्ही फुटेज पोलिसांना सापडले आहे. त्याआधारे पोलिसांनी तपासाची चक्रे फिरवली आहेत. हा व्हिडिओ पाहून काळजाचा थरकाप उडाल्याशिवाय राहणार नाही. हा व्हिडिओ समाजमाध्यमांवर प्रचंड व्हायरल होत आहे.
नेमकं काय घडलं?
फुलेनगर वाडीतील सुधीर ओमप्रकाश सिंह हा तरुण आपल्या कुटुंबासोबत राहतो. तिथे त्याच परिसरात त्याचा तबेलाही आहे. तुटलेल्या गाडीच्या वेल्डिंगचे काम करण्यासाठी तो घराजवळील दुकानात गेला होता. त्याठिकाणी तो उभा असताना अचानक मोटरसायकलवरून आलेल्या 8 ते 9 तरुणांनी त्याच्यावर भीषण हल्ला चढवला. या हल्लेखोर आरोपींकडे तलवार, कोयता यांसारखी घातक हत्यारे होती आणि त्यांनी थेट जीव घेण्याच्या उद्देशाने मारहाण केली. या हल्ल्यात सुधीर सिंह याच्या पाठीवर, हातावर आणि पायावर गंभीर जखमा झाल्या असून त्याला तात्काळ उल्हासनगरच्या मध्यवर्ती रुग्णालयात दाखल करण्यात आले.
हल्लेखोरांनी पळ काढताना सुधीरची मोटरसायकलसुद्धा फोडून टाकली. संपूर्ण घटना जवळील सीसीटीव्ही कॅमेऱ्यात स्पष्ट दिसून आली आहे. याप्रकरणी अंबरनाथ पश्चिम पोलीस ठाण्यात गुन्हा दाखल करण्यात आला आहे. पोलिसांनी हल्लेखोरांच्या टोळीचा शोध तीव्र गतीने सुरु केला आहे. शहरातील वाढत्या गुंडगिरीमुळे नागरिकांमध्ये मोठी घबराट पसरली आहे.