नाशिकमध्ये दिवसेंदिवस गारठा वाढत चालला असून, किमान तापमानात दररोजच घट होत आहे. शहरात किमान तापमान १० अंश सेल्सिअसच्या खाली घसरले असून, सोमवारी (दि. १७) सकाळी ९.६ अंश सेल्सिअस तापमानाची नोंद झाली. चार दिवसांत किमान तापमानात १.३ अंश सेल्सिअसची घसरण झाली असून, थंडीचा कडाका वाढतो आहे. निफाडमध्येही किमान तापमान ८.३ अंश सेल्सिअस नोंदविले गेले आहे.
उत्तरेकडून वाहणाऱ्या थंड वाऱ्याचा प्रवाह सुरूच असून, त्यामुळे नाशिक शहरासह जिल्ह्यात सकाळसह दिवसभर गारठा जाणवतो आहे. उत्तर महाराष्ट्रासह मराठवाड्यात थंडीची लाट पसरली आहे. उर्वरित महाराष्ट्रातदेखील गारठा वाढण्याचा अंदाज वर्तविला जातो आहे. निफाडमध्ये रविवारी या हंगामातील नीचांकी आठ अंश सेल्सिअस तापमानाची नोंद झाली होती, तर नाशिकमधील किमान तापमानदेखील १०.१ अंश सेल्सिअस नोंदविले गेले होते. त्याआधी शुक्रवारी १०.९ अंश सेल्सिअस तापमान नोंदविले गेले होते. म्हणजेच चार दिवसांत १.३ अंश सेल्सिअसने, तर २४ तासांत अर्धा अंश सेल्सिअसने किमान तापमान घसरले आहे.
किमान तापमानाचा पारा दहा अंश सेल्सिअसने घसरल्यास आणि तापमानात सरासरीपेक्षा ४.५ अंशांपेक्षा अधिक घट झाल्यास थंडीची लाट आली असे मानले जाते. मध्य महाराष्ट्र, मराठवाडा, विदर्भात हुडहुडी कायम आहे. प्रादेशिक हवामान केंद्राने दिलेल्या माहितीनुसार, जालना, बीड, छ. संभाजीनगरात थंडी वाढणार आहे.
गेल्या आठवडाभरातील तापमान
दिनांक -किमान -कमाल
१० नोव्हेंबर १०.८ —२९.४
११ नोव्हेंबर १०.७ —२९.१
१२ नोव्हेंबर १०.६ —२९.३
१३ नोव्हेंबर १०.३ —२९.४
१४ नोव्हेंबर १०.९ —२८.३
१५ नोव्हेंबर १०.३ —२७.९
१६ नोव्हेंबर १०.१ —२७.७
१७ नोव्हेंबर ९.६ —२७.२
कमाल तापमानातही नोंदविली घट
किमान तापमानाबरोबरच कमाल तापमानातही घट होण्यास सुरुवात झाली आहे. त्यामुळे नागरिकांना दिवसादेखील बऱ्यापैकी गारवा जाणवतो आहे. १० नोव्हेंबरला कमाल तापमान २९.४ अंश सेल्सिअस नोंदविले गेले होते. परंतु, बरोबर आठवडाभराने १७ नोव्हेंबरला किमान तापमान २७.२ अंश सेल्सिअस नोंदविले गेले आहे. म्हणजेच आठवडाभरात किमान तापमानात २.२ अंशांची घसरण झाली आहे.