बाहेर मुलींशी अफेअर असल्याच्या मोबाइलमधील मेसेजवरून संशय आल्याने जाब विचारणाऱ्या पत्नीस चिखली युवक काँग्रेसचा शहराध्यक्ष विशाल काकडे याने जीवे मारण्याचा प्रयत्न केला. अंगावर पेट्रोल ओतले आणि गॅस सुरू करून साडीचा पदर पेटवून दिला. आरडाओरड करीत बाथरुममध्ये जाऊन पत्नीने भडकलेला पदर पाण्याने विझविल्याने अनर्थ टळला. रविवारी चिखली शहरात ही घटना घडली.
नेमकं काय घडलं?
विशाल उर्फ रिकी काकडे याची पत्नी नमिता दोन महिन्यांपासून नगर परिषदेमध्ये सफाई कामगार म्हणून कामे करते. काकडे दाम्पत्यास तीन व एक वर्षाचा मुलगा आहे. विवाहितेच्या तक्रारीनुसार, ९ डिसेंबर २०२० रोजी तिचे लग्न विशालसोबत झाले. लग्नाच्या सहा महिन्यांतच सासू रेखा रघुवीर काकडे घरगुती कामांवरून टोमणे मारत मारहाण करू लागली.
पती रिक्की व मोठी नणंद भावना काकडे हे दोघे सासूचे ऐकून मारहाण करायचे. ९ नोव्हेंबरला सकाळी आठ वाजता दोघा पती-पत्नीमध्ये वाद झाला. पतीच्या मोबाइलवर एका मुलीचे मेसेज आले. त्यावेळी पत्नीने मोबाइल हिसकावला असता अनेक मेसेज दिसले. याबाबत विचारणा केली असता विशालने तिला मारहाण केली. त्याने हिसकावून घेताना मोबाइल पडून फुटला. सासू रेखा व नणंद भावनाने चिथावणी दिल्यानंतर विशालने बॉटलमधील पेट्रोल नमिताच्या अंगावर ओतले आणि गॅस सुरू करून तिचा पदर पेटविला. पेटलेली साडी स्वतः विझवून तिने जीव वाचविला. याप्रकरणी पती, सासू व नणंदेविरुद्ध गुन्हा दाखल करण्यात आला आहे.
मुलाने केली वडिलांची हत्या
तर, दुसरीकडे वडिलांना लग्नावरून विचारले, मुलाने रागाच्या भरात डोक्यात विटा मारल्याने वडिलांचा मृत्यू झाला. ही धक्कादायक घटना भंडारा जिल्ह्यातील लाखांदूर तालुक्यातील आथली येथे घडली. प्रदीप पुरुषोत्तम कुंभलवार (वय ३३) या मुलाने रागाच्या भरात वडिलांच्या डोक्यावर विटेचा तुकडा मारला. यात पुरुषोत्तम विश्वनाथ कुंभलवार (वय ५७) यांचा जागीच मृत्यू झाला. पोलिसांनी आरोपी मुलाला अटक केली आहे .