पिंपरी-चिंचवड पोलिसांच्या दहशतवाद विरोधी पथकाने भोसरी परिसरात केलेल्या एका धडक कारवाईत बांग्लादेशी महिलेला अटक करण्यात आली असून, या प्रकरणामुळे परिसरात मोठी खळबळ उडाली आहे. आता तिच्यावर गुन्हा दाखल करण्यात आला असून तिला परत बांग्लादेशला पाठवण्याची प्रक्रिया सुरु केली जात असल्याची माहिती आहे.
गेल्या आठ वर्षांपासून अवैधरित्या भारतात वास्तव्य
याप्रकरणी मिळालेल्या अधिक माहितीनुसार, फातिमा अमजद अख्तर (वय 35) ही महिला गेल्या सात ते आठ वर्षांपासून भारतात वास्तव्यास आहे. पण, ती मूळची बांग्लादेशातील असल्याची माहिती आहे. सुरुवातीला वैध व्हिसावर कामाच्या शोधात ती भारतात आली होती. मात्र, व्हिसाची मुदत संपल्यानंतरही ती भारतात अवैधरित्या राहत असल्याचं समोर आलं आहे.
फातिमा बेगम फईमुद्दीन या खोट्या नावाने राहायची
धक्कादायक बाब म्हणजे, भोसरी परिसरात ‘माला विठ्ठल डावखर उर्फ फातिमा बेगम फईमुद्दीन’ या खोट्या नावाने ती स्थानिक कुटुंबांकडे घरकाम करत होती. या काळात तिने लग्नही केलं. तिने कर्नाटकच्या एका युवकासोबत लग्न केलं आणि हे दोघंही भोसरीत एकत्र राहू लागले. आश्चर्य म्हणजे, तिच्या पतीला सुद्धा तिच्या बांग्लादेशी नागरिकत्वाबाबत आणि व्हिसाची मुदत संपल्याची माहिती असूनही त्याने ही बाब लपवून ठेवली होती.
ATS ला माहिती मिळताच कारवाई
या सर्व घडामोडींची माहिती ATS ला मिळताच त्यांनी तातडीने कारवाई केली आणि फातिमाला ताब्यात घेतले. प्राथमिक चौकशीत तिने आपली खरी ओळख मान्य केली असून, तिच्याकडे कोणतीही वैध कागदपत्रे आढळेली नाहीत.