शहरात धक्कादायक घटना समोर आली आहे. वडील दररोज दारू पिऊन घरी यायचा आणि पत्नी आणि मुलाला त्रास देत होता. कधी-कधी पत्नीला मारहाण देखील करत होता. दररोज दारू पिऊन येऊन घरी धिंगाणा करत असल्यामुळे घरातील वातावरण पूर्णतः बिघडले होते. वडिलांच्या या कृत्यामुळे आई आणि मुलगा प्रचंड तणावामध्ये आपलं जीवन जगत होते. त्रासाला कंटाळलेल्या अल्पवयीन मुलाने दारू पिऊन आलेल्या बापाला चाकूने भोसकून त्यांची हत्या केली. परभणीच्या गंगाखेड तालुक्यातील इसाद या गावात 4 नोव्हेंबर मंगळवार रोजी रात्रीच्या सुमारास घडली आहे.
मिळालेल्या माहितीनुसार, परभणीच्या गंगाखेड तालुक्यातील इसाद येथील रहिवासी गणेश अंकुशराव भोसले, वय 40 वर्षीय, हे दररोज रात्री दारू पिऊन आपल्या पत्नी आणि मुलाला त्रास देत होते. मुलाला आणि पत्नीला शिवीगाळ करून मारहाण देखील करत होते. त्यामुळे त्यांच्या त्रासाला कुटुंबातील सर्व जण वैतागले होते. 4 नोव्हेंबर रोजी रात्री नेहमीप्रमाणे वडील गणेश भोसले दारू पिऊन घरी आले, घरी आल्यानंतर त्यांनी पत्नी आणि मुलासोबत वाद घालण्यास सुरुवात केली. यावेळी पत्नीला मारहाण देखील केली. त्यामुळे गणेशच्या चिडलेल्या अल्पवयीन मुलाने घरामध्ये असलेला चाकूच घेतला आणि आपल्या वडिलांच्या डोक्यात, मानेवर, डाव्या बरगडीच्या बाजूने आणि पोटात चाकूचे वार केले. त्यामुळे गणेश भोसले गंभीर जखमी झाले आणि त्यांचा जागीच मृत्यू झाला.
हत्या झाल्याची बातमी गंगाखेड पोलिसांना 5 नोव्हेंबर रोजी सकाळी नऊच्या दरम्यान मिळाली. यानंतर गंगाखेड पोलीस तात्काळ घटनास्थळी दाखल झाले. पोलीस निरीक्षक श्रीकांत डोंगरे, सहाय्यक पोलीस निरीक्षक आदित्य लोणीकर, शिवाजी शिंगणवाड राम गीते, पोलीस उपनिरीक्षक व्यंकट गंगलवाड यांनी घटनास्थळाची पाहणी केली. त्यानंतर फॉरेन्सिक पथकाला देखील त्या ठिकाणी बोलवण्यात आलं. पंचनामा करून मृतदेह गंगाखेड उपजिल्हा रुग्णालयात आणण्यात आला. त्यानंतर रात्री उशिरा मृताच्या मुलाविरोधात हत्येचा गुन्हा दाखल करण्यात आला आहे.
दरम्यान, ग्रामीण भागात दारुमुळे घरं उध्वस्त होताना दिसत आहेत. सध्या ग्रामीण भागात मोठ्या प्रमाणावर अवैध दारू विक्री वाढली आहे. त्याचबरोबर व्यसनाधीनतेचं प्रमाण देखील वाढल्याने ग्रामीण भागातील कुटुंब व्यवस्था पूर्णतः विस्कळीत होताना दिसत आहे. त्यामुळे राज्य सरकारने आता तरी दारूबंदी संदर्भात योग्य तो विचार करावा, अशीच मागणी ग्रामीण भागातून करण्यात येत आहे.