दुग्धविकासमंत्री एकनाथ खडसे यांच्या आदेशानंतरही ‘महानंदा’ने दुधाची प्रती लिटर कमाल किरकोळ किंमत (एमआरपी) अद्याप कमी केलेली नसतानाच, ‘मदर डेअरी’ या खासगी कंपनीने , आपल्या वेगवेगळ्या प्रकारांतील दुधाची किंमत दोन रुपयांनी कमी करण्याचा निर्णय घेतला आहे. कंपनी त्याबाबत लवकरच जाहिरात देणार आहे.
किंमत कमी करण्याबरोबरच दुधाच्या पिशवीवर ‘एमआरपी’च्या तपशीलात ‘कूलिंग चार्जेस आणि वाहतूक कर समाविष्ट’ असे शब्द वाढवण्याचेही कंपनीने ठरवले आहे.
ग्राहकांकडून कूलिंग चार्जेसच्या नावाखाली ‘एमआरपी’पेक्षा जास्त किंमत घेतली जात असल्याने वैध मापन शास्त्र (एलएमओ) विभागाने कारवाई सुरू केल्यानंतर दूध विक्रेत्यांनी ‘महानंदा’, ‘मदर डेअरी’, ‘गोकुळ’, ‘वारणा’ आणि ‘अमूल’ या कमी कमिशन देणाऱ्या कंपन्यांच्या दूधविक्रीवर बहिष्कार घालण्याचा इशारा दिला होता. त्यामुळे ‘महानंदा’ने दोन रुपये वाढवल्याने त्या दुधाची ‘एमआरपी’ ४० रुपये झाली. सरकारच्या आदेशानंतरही अद्याप ती कमी करण्यात आलेली नाही. किंमत कमी करण्याचा निर्णय संचालक मंडळच घेऊ शकते. त्यामुळे ३ जूनला होणाऱ्या बैठकीत तसा निर्णय होऊ शकेल, असे ‘महानंदा’च्या एका अधिकाऱ्याने स्पष्ट केले.