आजची स्त्री पुरुषांच्या बरोबरीने काम करीत असली, तरी अजूनही नवरा, मुलांचे पालन-पोषण, कौटुंबिक जबाबदाराऱ्या आणि नातेवाईकांची उठबस अशा चक्रात अडकल्याने महिला स्वतःच्या आरोग्यकडे पूर्ण दुर्लक्ष करीत असल्याचे आढळून आले आहे. शहरातील ३० टक्के, तर ग्रामीण भागातील ६० टक्के महिला स्वतःच्या आरोग्यबाबत उदासीन असल्याचे निरीक्षण डॉक्टरांनी नोंदवले आहे. त्यामुळे आजारी पडल्यावर डॉक्टरांकडे धाव घेण्याऐवजी नियमित आरोग्यविषयक तपासण्या करण्याचा सल्ला स्त्री-रोगतज्ज्ञ देतात.
महिलांमध्ये आरोग्यजागृतीसाठी ‘वर्ल्ड हेल्थ ऑर्गनायझेशन’च्या वतीने २८ मे हा दिवस जागतिक महिला आरोग्य दिन म्हणून पाळण्यात येतो. यानिमित्त स्त्री रोगतज्ज्ञांशी चर्चा केल्यावर अंसख्य महिला स्वतःच्या आरोग्याबाबत उदासीन असल्याचे पुढे आले आहे. केवळ अशिक्षित महिला नव्हे, तर सुशिक्षित व नोकरदार महिलाही स्वतःच्या आरोग्यकडे दुर्लक्ष करीत असल्याचे डॉक्टरांचे म्हणणे आहे.
संकोच सोडून द्या…
महिलांमध्ये गर्भाशयाच्या आणि स्तनाच्या कॅन्सरचे प्रमाण वाढत आहे. कोणत्याही सरकारी किंवा पालिका हॉस्पिटलमध्ये जाऊन साधी तपासणी केली, तर भविष्यातील अनेक आजारांना वेळीच प्रतिबंध घालता येईल. पण, अंतर्गत तपासणी व संकोच यामुळे महिला तपासणीसाठी पुढे येत नाहीत, अशी खंत प्रख्यात स्त्री रोगतज्ज्ञ डॉ. रेखा दावर यांनी व्यक्त केली. अगदी साधी सोपी पॅपस्मीअर चाचणी कोणत्याही सरकारी हॉस्पिटलमध्ये उपलब्ध आहे.
पस्तीशीपुढील महिलांसाठी…
वयाची पस्तीशी पार केलेल्या महिलांनी खास काळजी घेण्याची गरज आहे. स्तनाचा कॅन्सर टाळण्यासाठी अगदी घरच्या घरी महिलांना तपासणी करता येईल. स्तनात लहानशी गाठ किंवा द्रवपदार्थ स्रवत असेल, तर तत्काळ तज्ज्ञ डॉक्टरांकडे जाण्याचा सल्ला डॉक्टर देतात. अनेक महिला स्तनातील गाठी मोठ्या झाल्यावर डॉक्टरकडे धाव घेतात. पण, तेव्हा विलंब झालेला असतो. अंगावरून पांढरे पाणी जात असेल, तर दुर्लक्ष करू नका. कॅन्सरचे पहिले लक्षण असण्याची नाकारता येत नाही.
प्रतिबंधात्मक चाचण्यांकडे दुर्लक्ष
स्थूल महिलांनी संततीप्रतिबंधक गोळ्या घेणे धोकादायक
शहरातील ३० टक्के महिला आरोग्यबाबत उदासीन
ग्रामीण भागातील ६० टक्के महिलांचे आरोग्यकडे दुर्लक्ष
मासिक पाळी अनियमित असल्यास डॉक्टरांकडे जा
महिलांनो तुमचे आरोग्य चांगले असेल, तरच तुम्ही कुटुंबाची चांगल्या प्रकारे काळजी घेऊ शकता. घरच्यांची काळजी घेताना स्वतःचीही काळजी घ्या. घरातील महिला आजारी पडली, तर संपूर्ण घरच विस्कळीत होते. त्यामुळे योग्य वेळेत प्रतिबंधात्मक चाचण्या करून घ्या. अंतर्गत चाचण्यांसाठी संकोच वाटत असल्याने महिलातज्ज्ञ डॉक्टरकडे जा. पण आजार अंगावर काढू नका