नाशिकरोड परिसरातील जुने सामनगाव येथे सोमवारी (दि. 20 ऑक्टोबर) दुर्दैवी घटना घडली. अनुसया दिगंबर जगताप (वय 70) आपल्या घराच्या अंगणात भुईमुगाच्या शेंगा खुडत होत्या. समोर त्यांच्या नातवंडांचा खेळ सुरू होता. लहान नातू ट्रॅक्टरवर खेळत असताना चुकून क्लच दाबला गेला आणि ट्रॅक्टर अचानक पुढे सरकला. अनुसया यांच्या अंगावर गेला आणि त्या गंभीर जखमी झाल्या.
उपचारादरम्यान वृद्ध आजीचा मृत्यू
कुटुंबीयांनी अनुसया जगताप यांना तातडीने नाशिकरोड येथील खासगी रुग्णालयात दाखल केलं. मात्र, डॉक्टरांनी उपचारादरम्यान त्यांना मृत घोषित केलं. पोलिसांनी आकस्मिक मृत्यूची नोंद केली असून पुढील तपास पोलिस हवालदार झाडे करत आहेत.
आनंदाचा सण झाला शोकाचा प्रसंग
दिवाळी म्हणजे प्रकाशाचा आणि आनंदाचा उत्सव. पण जगताप कुटुंबासाठी हा सण काळोख घेऊन आला. नातवाच्या निष्पाप खेळातच आजीचा जीव गेला, याने गावात आणि परिसरात शोककळा पसरली. गावकऱ्यांनीही या घटनेबद्दल तीव्र हळहळ व्यक्त केली आहे.
बीडमध्येही खेळताना घडली दुर्दैवी दुर्घटना
दरम्यान, राज्यातील बीड जिल्ह्यातही खेळता खेळता आणखी एक गंभीर प्रकार घडला आहे. येथे सहा वर्षांचा मुलगा फटाके फोडत असताना डाव्या डोळ्याची दृष्टी गमावली आहे. सोमवारी दिवाळीनिमित्त तो फटाके फोडत होता. एक फटाका पेटवून तो बाजूला झाला, पण बराच वेळ फटाका न फुटल्याने तो पुढे जाऊन पुन्हा पेटवण्याचा प्रयत्न करत होता. तेवढ्यात फटाका फुटला आणि त्याच्या चेहऱ्यावर उडालेल्या ठिणग्यांमुळे डोळ्याला गंभीर इजा झाली.
मुलाची डाव्या डोळ्याची दृष्टी गेली
गंभीर जखमी अवस्थेत त्याला तातडीने बीड येथील रुग्णालयात दाखल करण्यात आलं. डॉक्टरांनी तपासणी केल्यानंतर सांगितलं की त्याचा डावा डोळा पूर्णपणे डॅमेज झाला असून त्याची दृष्टी गेली आहे. या घटनेमुळे दिवाळीचा आनंद त्या कुटुंबासाठी दुःखात बदलला आहे.