एका महिला डॉक्टरने आपल्या आयुष्याची अखेर केल्याची धक्कादायक घटना घडली आहे. साताऱ्यातील फलटण उपजिल्हा रुग्णालयातील महिला डॉक्टर यांनी आपले आयुष्य संपवले आहे. या घटनेने फलटण उपजिल्हा रुग्णालयात शोककळा पसरली आहे.
याप्रकरणी मिळालेल्या अधिक माहितीनुसार, गेल्या काही महिन्यांपासून या महिला डॉक्टर पोलीस आणि आरोग्य विभागाच्या वादात अडकल्या होत्या. वैद्यकीय तपासणीसंदर्भात पोलिसांशी झालेल्या वादानंतर त्यांच्यावर चौकशी सुरु होती.
माझ्यावर अन्याय होत आहे, मी जीव देईन; वारंवार वरिष्ठांकडे तक्रार
आपल्यावर अन्याय होत आहे, मी जीव देईन, अशी तक्रारही त्यांनी वरिष्ठांकडे यापूर्वी केल्याची माहिती आहे. त्यानंतर अखेर गुरुवारी (23 ऑक्टोबर) रात्री त्यांनी हे टोकाचं पाऊल उचललं आहे. त्यांच्या या निर्णयाने फलटण उपजिल्हा रुग्णालय आणि आरोग्य क्षेत्रात एकच खळबळ माजली आहे.
माझ्यावर अन्याय होत असल्याची तक्रार त्यांनी वारंवार केली होती. हा अन्याय आपण सहन करणार नाही, असंही त्या म्हणाल्या होत्या. पोलिसांनी या प्रकरणाची नोंद केली असून महिला डॉक्टर यांनी आपल्या आपल्या आयुष्याची अखेर का केली याचं कारण शोधण्याचा प्रयत्न सध्या पोलीस करत आहेत. मात्र, पोलीस आणि आरोग्य विभागातील वाद, त्यांच्यावर सुरु असलेली चौकशी या सर्वांमुळे त्या मानसिक तणावात असल्याची शक्यताही वर्तवली जात आहे. त्यातूनच त्यांनी हे धक्कादायक पाऊल उचलल्याचं म्हटलं जात आहे.
तरी, पोलीस सध्या या प्रकरणाच सखोल तपास करत असून महिला डॉक्टर यांनी जीव देण्यापूर्वी कुठली सुसाइड नोट वगैरे लिहून ठेवली आहे का, याचाही शोध घेत आहेत. तरी, या घटनेने वैद्यकीय विभागातील कामाचा ताण आणि डॉक्टरांच्या मानसिक तणावाचा मुद्दा पुन्हा एकदा चर्चेत आला आहे. अति काम, प्रशासकीय अडचणी, दबाव या सर्वांमुळे आरोग्य विभागातील कर्मचारी मोठ्या मानसिक तणावात असल्याचं पुन्हा एकदा समोर आलं आहे. त्यामुळे यावर लवकरात लवकर उपाययोजना करण्याची गरज असल्याचं दिसून येत आहे.