राज्याची सांस्कृतिक राजधानी असणाऱ्या पुणे शहरात एक संतापजनक प्रकार घडला आहे. विद्येचे माहेरघर असणारे पुणे हे क्राईम कॅपिटल बनत चालले आहे. एकीकडे गुन्हेगारीचा विळखा पुणे शहराला बसत असताना दुसरीकडे पुण्यातील मॉडेल कॉलनी परिसरात विकृतीचा कळस गाठणारी घटना समोर आली आहे. शहरातील वडारवाडी परिसरात क्रौर्याची संतापजनक घटना घडली असून एका व्यक्तीने भटक्या कुत्र्यासोबत अनैसर्गिक कृत्य केल्याचा आरोप आहे. या प्रकरणी चतुःश्रृंगी पोलिसांनी संशयिताला अटक केली आहे.
पोलिसांनी दिलेल्या माहितीनुसार, अटक करण्यात आलेल्या व्यक्तीचे नाव श्यामराव धोत्रे असं आहे. या प्रकरणी प्राणीप्रेमी संजय शिंदे (वय 59, रा. मॉडेल कॉलनी, पुणे) यांनी तक्रार दाखल केली आहे. शिंदे आणि त्यांचा स्वयंसेवकांचा गट हा परिसरातील भटक्या प्राण्यांच्या खाण्या-पिण्याची आणि उपचारांची जबाबदारी घेतो. काही दिवसांपासून त्यांच्याकडे येणारा एक कुत्रा अचानक गायब झाल्याने त्यांनी चौकशी सुरू केली. त्यावेळी परिसरातील रहिवाशांकडून मिळालेल्या माहितीवरून आणि एका व्हिडिओच्या आधारे, त्या कुत्र्यावर अत्याचार झाल्याचे स्पष्ट झाले.
शिंदे यांनी दिलेल्या फिर्यादीनुसार , ते मॉडेल कॉलनी भागात भटक्या प्राण्यांची काळजी घेण्याचे, खाण्यापिण्याचे आणि उपचार करण्याचे कार्य करतात. त्यांचे सहकारी शंकर चुघाणे, साहिल ठाकरे आणि रंजन जोशी यांच्यासह ते हे कार्य करतात. दिनांक 10/10/2025 रोजी सकाळी 6.30 वाजता, ते आणि त्यांच्या सहकाऱ्यांनी परिसरात भटक्या कुत्र्यांना खाऊ देण्यासाठी गेले असता, त्यांना परिसरातील एक कुत्रा काही दिवसांपासून दिसत नसल्याचे लक्षात आले. यानंतर शोध घेतल्यावर आणि 22/09/2025 ते 23/09/2025 दरम्यान घडलेल्या घटनेबाबत चौकशी केली असता, श्यामराव धोत्रे (रा. वडारवाडी, पुणे) या व्यक्तीने त्या कुत्र्यावर अमानुष वर्तन केल्याचे आढळले. या संदर्भात मिळालेल्या व्हिडिओमधून आरोपीचे कृत्य स्पष्टपणे दिसून आले असल्याचे नमूद केले आहे. या घटनेनंतर संबंधित कुत्रा आजारी झाला असून उपचारासाठी नेण्यात आला.
दरम्यान, या अमानुष कृत्याचा व्हिडिओ सोशल मीडियावर प्रसारित झाल्यानंतर संतापाची लाट उसळली आहे. या प्रकरणी पोलिसांनी प्राण्यांवरील क्रौर्य प्रतिबंधक कायद्यानुसार तसेच भारतीय दंड संहितेतील संबंधित कलमान्वये गुन्हा दाखल केला आहे. पुढील तपास चतुःश्रृंगी पोलिस ठाण्याचे पथक करत आहे.