मुंबईतील पवई आयआयटीमध्ये धक्कादायक प्रकार घडला उघडकीस आला आहे. वसतिगृहात विद्यार्थ्यांचे अंघोळ व शौचालयातील नग्न चित्रीकरण करण्यात आलं. हा प्रकार करताना माजी विद्यार्थी राहुल पांडे याला विद्यार्थ्यांनी रंगेहाथ पकडले. त्यानंतर तपासणी केली असता पांडे याच्या मोबाईलमध्ये अनेक व्हिडिओ सापडले. याप्रकरणी पवई पोलिसांनी गुन्हा दाखल करून त्याला अटक केली आहे.
याबाबतची सविस्तर माहिती अशी की, पवई आयआयटीतील वसतिगृहात विद्यार्थ्यांचे अंघोळ करतानाचे आणि शौचालयातील नग्न चित्रीकरण करण्यात आल्याचा धक्कादायक प्रकार समोर आला आहे. आयआयटीमध्ये शिक्षण पूर्ण केलेल्या राहुल पांडे या माजी विद्यार्थ्याला मोबाइलमध्ये चित्रीकरण करताना विद्यार्थ्यांनी पकडलं. त्याच्या मोबाइलमध्ये असे अनेक व्हिडीओ सापडले असून पवई पोलिसांनी गुन्हा दाखल करून त्याला अटक केली.
पवई आयआयटीमधील वसतिगृहाच्या सुरक्षारक्षकाने याप्रकरणी तक्रार दिली आहे. राहुल पांडे हा आयआयटीचा माजी विद्यार्थी असून 2024 मध्ये त्याने इलेक्ट्रिक विभागातून एमटेक पदवी घेतली आहे. काही कामानिमित्त तो एका अधिकाऱ्याच्या शिफारशीवरून दोन दिवसांच्या पासवर पवई आयआयटीच्या वसतिगृहात राहण्यासाठी आला होता. मात्र इथं आल्यानंतर त्याने भलताच प्रकार सुरू केला. 12 ऑक्टोबर रोजी काही विद्यार्थ्यांनी राहुल याला शौचालयामध्ये चोरून व्हिडीओ काढताना पकडले.
दरम्यान, सुरक्षारक्षकांनी वसतिगृह प्रशासनाला कळवल्यानंतर, त्यांनी पवई पोलिसांना माहिती दिली. याबाबत चौकशी करत पोलिसांनी राहुल पांडे याला बेड्या ठोकल्या आहेत. विद्यार्थ्यांचे नग्न व्हिडिओ काढण्यामागे राहुल पांडे याचा काय उद्देश होता, हे पोलीस तपासानंतरच स्पष्ट होणार आहे. मात्र विद्यार्थ्यांच्या वसतिगृहात असा प्रकार घडल्याने खळबळ उडाली असून पोलिसांकडून याप्रकरणी अधिक तपास केला जात आहे.