भाजपचे विधान परिषद आमदार प्रसाद लाड यांच्या लेटरहेडचा गैरवापर करुन बनावट कागदपत्रे तयार केल्याच्या प्रकरणातील मुख्य संशयित हा भाजप युवा मोर्चाचा कार्यकर्ता निघाल्याने खळबळ उडाली आहे. मुंबईतील सायन पोलिसांनी अमित सोळुंके हा मुख्य संशयित असल्याचे म्हटले आहे. सोळुंकेने फेसबुक प्रोफाईलवर स्वतःची ओळख भारतीय जनता युवा मोर्चा (भाजयुमो) चा महाराष्ट्र प्रदेश सचिव अशी दिली आहे.
अमित सोळुंकेने रत्नागिरीत रस्त्याचे कंत्राट मिळवण्यासाठी बनावट लेटरहेड वापरल्याचा आरोप आहे. न्यायालयाने आरोपी अमित सोळुंके याला अटकपूर्व जामीन मंजूर केला असून तपासात सहकार्य करण्याचे निर्देश दिले आहेत.
काय आहे प्रकरण?
भाजप आमदार प्रसाद लाड यांचे लेटरहेड आणि सहीचा गैरवापर करुन 3 कोटी 60 लाख रुपयांचा निधी बीड जिल्ह्यासाठी वळवण्याचा प्रयत्न करत झाल्याचा आरोप करत 2 जुलै रोजी एफआयआर दाखल केला होता.
“साक्षीदारांच्या जबाबामध्ये आरोपी अमित सोळुंके याची भूमिका समोर आली आहे” असे सरकारी वकिलांनी त्याच्या जामीन अर्जाला विरोध करताना म्हटले होते. प्रसाद लाड यांचे सहाय्यक सचिन राणे यांना मुंबईतील डीपीओ संदीप भाकरे यांनी एका संशयास्पद पत्राबद्दल माहिती दिली होती.
तपासानंतर, प्रसाद लाड यांच्या नावे बोलणाऱ्या एका व्यक्तीने एका विशिष्ट मोबाईल नंबरवरुन तोंडी हमी दिल्याचे उघड झाले. त्यानंतर, लाड यांनी रत्नागिरी जिल्हाधिारी आणि जिल्हा नियोजन कार्यालयाला पत्र त्वरित रद्द करण्यास सांगितले.