रविवारपासून सुरू असलेल्या मुसळधार पावसाने आजही (21 जुलै) सकाळपासून चांगलाच जोर धरला आहे. मुंबईच्या अनेक भागात मुसळधार पावसामुळे पाणी भरल्याचेही चित्र आहे. अशातच आज सकाळपासून शहरात मुसळधार पाऊस सुरू असताना, मुंबईच्या वातानुकूलित लोकल ट्रेनमधील एसी व्हेंटमधून पावसाचे पाणी गळत असल्याचा व्हिडिओ प्रचंड व्हायरल होत आहे. मुंबईत जोरदार पावसामुळे एसी लोकलमध्ये पाणी शिरले. ऐन गर्दीच्यावेळी एसी लोकच्या छतावरुन पाण्याच्या धारा वाहत होत्या. संतापलेल्या प्रवाशांनी याचा व्हिडिओ बनवून तो सोशल मीडियावर टाकला. व्हिडिओ व्हायरल होताच रेल्वे प्रशासनाने या घटनेची दखल घेतली आहे. मुंबईत रविवारपासून जोरदार पाऊस सुरू आहे. यामुळे अनेक ठिकाणी पाणी साचले आहे.
गर्दीच्या वेळी, ज्यावेळी चाकरमानी आपआपल्या रोजी-रोटीवर जायला निघालेले असतात त्यावेळी एसी लोकल ट्रेनमध्ये पावसाचे पाणी शिरल्याने प्रवाशांना त्रास झाला. एका प्रवाशाने या घटनेचा व्हिडिओ X (ट्विटर) वर शेअर केला. ‘जय हो’ नावाच्या युजरने म्हटले, “ही मुंबईची एसी लोकल आहे. सर्व पावसाचे पाणी आत येत आहे. याचसाठी आम्ही इतके पैसे देतो का?”. त्यांनी रेल्वे मंत्रालय आणि इतर अधिकाऱ्यांकडे या प्रकाराची तक्रार केली.
रेल्वे प्रशासनाने या तक्रारीवर तातडीने कारवाई करण्याचे आश्वासन दिले. त्यांनी मध्य रेल्वेच्या मुंबई विभागाला या प्रकरणाची चौकशी करण्यास सांगितले. या घटनेमुळे मुंबईच्या रेल्वे व्यवस्थेच्या देखभालीवर प्रश्नचिन्ह निर्माण झाले आहे. काही दिवसांपुर्वी मुंब्रा येथे लोकलमधून पडून काही प्रवाशांचा मृत्यू झाला होता. त्यानंतर प्रशासनाने मुंबईच्या सर्व लोकल एसी करण्याचा प्रस्ताव विधिमंडळाच्या पावसाळी अधिवेशनात मांडला होता. जेणेकरुन लोकलच्या दारावर कोणालाही लोंबकळता येणार नाही. परंतु लोकलची दार बंद केल्यानंतरही जर प्रवाशांची गैरसोय होणार असेल तर प्रवाशांनी काय करावं? असा संतप्त सवाल प्रवाशांनी केला आहे.
दरम्यान, जोरदार पावसामुळे मरीन ड्राइव्ह, अंधेरी, कुर्ला आणि छत्रपती शिवाजी महाराज टर्मिनस परिसरात पाणी साचले. अंधेरी सबवे काही वेळासाठी बंद ठेवण्यात आला होता. कुर्ला, पवई आणि साकीनाका येथे वाहतूक कोंडी झाली होती.