मुंबईत अतिशय दुर्दैवी, धक्कादायक घटना समोर आली आहे. एका ३१ वर्षीय तरुणाने करी रोड इथे आयुष्य संपवल्याची घटना समोर आली आहे. शनिवारी सायंकाळी पाच वाजताच्या दरम्यान ही घटना समोर आली. या घटनेची माहिती मिळताच पोलिसांनी तपास सुरू केला आहे.
पोलिसांना मिळालेल्या प्राथमिक माहितीनुसार, अनिश दत्ताराम भडवळकर असं मृत तरुणाचं नाव आहे. ३१ वर्षीय तरुणाने त्याच्या राहत्या घराच्या छताच्या पंख्याला साडी बांधून गळफास घेतल्याची प्राथमिक माहिती आहे. अनिश भडवळकरच्या मृत्यूची बातमी समजताच त्याच्या कुटुंबीयांना मोठा धक्का बसला. लेकाने घेतलेल्या या टोकाच्या निर्णयाने सर्वच धक्क्यात असून त्याच्या कुटुंबीयांनी, नातेवाईकांनी तात्काळ घटनास्थळी धाव घेतली. तरुणाचा मृतदेह शवविच्छेदनासाठी पाठवण्यात आला असून शवविच्छेदन अहवालानंतरच मृत्यूचं कारण स्पष्ट होईल.
या घटनेबाबत अधिक माहितीसाठी पोलीस आसपासच्या लोकांची चौकशी करत आहेत. तसंच, तो राहत असलेल्या इमारतीमधील सीसीटीव्ही फुटेजची तपासणी देखील करण्यात येत आहे. अनिश भडवळकर यांच्या शेजाऱ्यांनी दिलेल्या माहितीनुसार, तो नेहमी शांत आणि मनमिळाऊ स्वभावाचा होता. त्याच्या मृत्यूमुळे परिसरात शोककळा पसरली आहे. पोलिसांनी या प्रकरणातील सर्व शक्यतांचा विचार करून तपास सुरू केला आहे.
मृत अनिश याच्या पश्चात त्याचे आई, वडील आणि भाऊ असा परिवार आहे. त्यांच्या मृत्यूने भडवळकर कुटुंबावर दुःखाचा डोंगर कोसळला आहे. पोलिसांनी घटनास्थळाचा पंचनामा केला असून, काही महत्त्वाचे पुरावे जमा केले आहेत. या पुराव्यांच्या आधारे तपास पुढे नेण्यात येणार आहे. या प्रकरणातील संशयितांची चौकशी देखील पोलीस करत आहेत. अनिशच्या मृत्यूमुळे त्यांच्या मित्र परिवारातही शोककळा पसरली आहे. त्याच्या मित्रांकडून सोशल मीडियावर श्रद्धांजली वाहिली जात आहे.