स्विफ्टची मागून धडक, पुण्यात मर्सिडीजची तोडफोड, 10 वर्षांच्या चिमुरड्याला गाडीत कोंडलं

स्विफ्टची मागून धडक, तरी मर्सिडिजची तोडफोड

संबंधित मर्सिडिज वाहन चालकाच्या नातेवाईकांनी दिलेल्या माहितीनुसार, एका स्विफ्ट गाडीने त्यांच्या मर्सिडिज वाहनाला पाठीमागून येऊन धडक दिली. अपघात झाल्यानंतर दोन्ही वाहनं रस्त्याच्या बाजूला आली असता, स्विफ्ट गाडी मधील काही पुरुष आणि एका महिला उतरले आणि त्यांनी मर्सिडिज गाडीची वाहनाची तोडफोड करायला सुरुवात केली.

मर्सिडिज वाहनातील 10 वर्षीय मुलाला तोडफोड करणाऱ्या व्यक्तींनी गाडीत कोंडून ठेवलं होतं असा आरोप नातेवाईकांनी केला आहे. याबाबत वाघोली पोलिस ठाण्यात पुढील कार्यवाही सुरू आहे.

दोन दुचाकींच्या धडकेत दोघे ठार

दुसरीकडे, संत तुकाराम महाराज पालखी महामार्गावर बारामती तालुक्यातील जराडवाडी येथे दोन दुचाकी एकमेकांना समोरासमोर धडकल्या. या अपघातात दोघे दुचाकीस्वार जागीच ठार झाले, तर एक महिला गंभीर जखमी झाली आहे.

शरद दत्तात्रेय मोरे (वय 36, रा. सोनवडी, सुपे, ता. बारामती) व ज्ञानेश्वर बबन वलेकर (42, रा. दहिगाव, ता. माळशिरस, जि. सोलापूर) अशी मृतांची नावे आहेत.

पोलिसांनी दिलेल्या माहितीनुसार, रविवारी सायंकाळी चारच्या दरम्यान संत तुकाराम महाराज पालखी महामार्गावरील जराडवाडी हद्दीत आठवा मैलजवळ अपघाताची घटना घडली आहे. यामध्ये हिरो होंडा स्प्लेंडर ही दुचाकी बारामतीच्या दिशेने निघाली होती. या वेळी समोरून होंडा ॲक्टिव्हा ही दुचाकी बारामतीकडून पाटसकडे निघाली होती. या दोन दुचाकी समोरासमोर एकमेकांवर जोरदार धडकून अपघात झाला आहे. अपघातात अक्कामाई ज्ञानेश्वर वलेकर (वय 39) या गंभीर जखमी झाल्या आहेत. त्यांना उपचारासाठी बारामतीतील खासगी रुग्णालयात दाखल करण्यात आले आहे.