पुणे शहराच्या पश्चिमेकडील बावधन ते वारजे दरम्यानच्या महामार्गावर रविवारी पहाटेच्या सुमारास एक धक्कादायक अपघात घडला. वेद विहार परिसरात भरधाव वेगाने जाणारी रिक्षा अचानक रस्त्याच्या मध्यभागी असलेल्या डिव्हायडरवर आदळली. या भीषण अपघातात रिक्षाचालक रिक्षामध्ये अडकून पडल्याने एकच खळबळ उडाली होती.
अपघात झालेली रिक्षा (क्रमांक MH 12 QR 4621) इतकी चिरडली गेली होती की चालक गणेश कोळसकर (वय ३५) यांना बाहेर काढणं अत्यंत कठीण झालं होतं. घटनेची माहिती मिळताच वारजे फायर स्टेशन आणि NDA अग्निशमन केंद्रातील रेस्क्यू पथक तातडीने घटनास्थळी दाखल झालं.
अग्निशमन दलाच्या जवानांनी विशेष ‘स्प्रेडर कटर’ उपकरणाच्या साहाय्याने रिक्षेचे भाग कापून, अत्यंत काळजीपूर्वक गणेश कोळसकर यांची सुटका केली. त्यांचे दोन्ही पाय रिक्षामध्ये अडकले होते. जवानांनी अत्यंत नियोजनबद्धपणे ही कारवाई करत त्यांना बाहेर काढलं आणि तत्काळ अॅम्ब्युलन्सद्वारे रुग्णालयात हलवलं. अपघातानंतर रिक्षा रस्त्यावर आडवी पडल्याने वाहतुकीला अडथळा निर्माण झाला होता. त्यामुळे पोलीस आणि अग्निशमन दलाने रिक्षा बाजूला करून रस्ता मोकळा केला.
या संपूर्ण बचाव मोहिमेत अग्निशमन अधिकारी सुनिल नामे यांच्या नेतृत्वाखाली विजय स्वामी, बाळू तळपे, आशिष सुतार, कोंडीबा झोरे, भंडारी, जांभळे, तसंच चालक गोडसे, कल शेट्टी आणि चौरे यांनी अपघातस्थळी मोठी मदत केली.
या अपघातात रिक्षाचालकाचा जीव वाचला असला तरी त्यांच्या दुखापतीचं स्वरूप गंभीर असून त्यांच्यावर रुग्णालयात उपचार सुरू आहेत. पोलीस अधिक तपास करत असून अपघाताचे नेमकं कारण अद्याप स्पष्ट झालेलं नाही.