जिंतूरमध्ये एका डॉक्टरने नर्स असलेल्या तरुणीचा विनयभंग केला. डॉक्टर कांगणे असे आरोपीचे नाव आहे. त्यांनी तरुणीला मस् काढायची विचारणा करत असताना मिठी मारली. तसेच, तिच्या अंगावरून हात फिरवला आणि पप्पी घेण्याचा प्रयत्न केला. यानंतर तरुणीने पोलिसात तक्रार दाखल केली. पोलिसांनी डॉक्टरवर विनयभंगाचा गुन्हा दाखल केला आहे. तसेच ॲट्रॉसिटी ॲक्टनुसार कारवाई केली आहे.
तोंडावर आणि मानेवर असलेली मस् काढायची होती
पीडित तरुणी जिंतूरच्या ब्रह्मांडनायक हॉस्पिटलमध्ये नर्स म्हणून काम करते. तिला महिन्याला पाच हजार रुपये पगार मिळतो. ७ जुलै रोजी सकाळी साडेनऊ वाजता ती कामावर आली. त्यावेळी हॉस्पिटलमध्ये फक्त डॉक्टर कांगणे होते. तरुणीने बेडची साफसफाई केली. तिला तिच्या तोंडावर आणि मानेवर असलेली मस् काढायची होती. यासाठी तिने डॉक्टर कांगणेंना विचारले.
दहाच्या सुमारास तरुणीने डॉक्टर कांगणेंना मस् काढण्याबद्दल विचारले. डॉक्टर कांगणे तिला कॅमेऱ्यात दिसत नाही अशा ठिकाणी घेऊन गेले. त्यांनी तिचा हात धरला आणि तिला मिठी मारली. तिच्या संपूर्ण अंगावरून हात फिरवला. डॉक्टर कांगणे एवढ्यावरच थांबले नाही. त्यांनी तिची हनुवटी पकडून पप्पी घेण्याचा प्रयत्न केला. “अजून तुझ्या शरीरावर कोठे कोठे मस् आहेत मला दाखव,” असे ते म्हणाले.
घाबरलेली तरुणी डॉक्टरला धक्का मारून बाहेर पडली. घरी जाऊन तिने आईला सर्व घटना सांगितली. त्यानंतर दोघींनी जिंतूर पोलीस स्टेशनमध्ये तक्रार दाखल केली. पोलिसांनी डॉक्टर कांगणे यांच्या विरोधात विनयभंगाचा गुन्हा दाखल केला आहे. या घटनेमुळे परिसरात संताप व्यक्त होत आहे.
दुसरीकडे, पुण्यातील लोहगाव येथील पोरवाल रस्ता परिसरातील एका ‘स्पा’ सेंटरमध्ये मसाजच्या नावाखाली अल्पवयीन मुलींना वेश्याव्यवसायासाठी प्रवृत्त केल्याचा प्रकार उघडकीस आला आहे. या प्रकरणात ‘स्पा’ सेंटरच्या महिला मॅनेजरला अटक केली असून, दोन अल्पवयीन मुलींसह पाच जणींची सुटका करण्यात आली आहे. दरम्यान, अल्पवयीन मुलीसह आई ‘स्पा’ सेंटरमध्ये वेश्याव्यवसायात ओढली गेल्याची धक्कादायक बाब समोर आली.