अभिनेत्री आणि मॉडेल शेफाली जरीवाला हिचे शुक्रवारी रात्री वयाच्या 42 व्या वर्षी निधन झाले. तिच्या सोसायटीचे वॉचमन शत्रुघ्न यांनी आदल्या रात्री काय झाले, याविषयी माहिती दिली. शेफालीला रात्री साडेदहा वाजताच्या सुमारास रुग्णालयात नेण्यात आले, असे त्यांनी सांगितले. पोलिसांना रात्री एक वाजता याविषयी माहिती मिळाली. सुरुवातीला कार्डिअॅक अरेस्टने तिचा मृत्यू झाल्याचे सांगण्यात येत होते, मात्र घरात ती मृतावस्थेत आढळल्याचे बोलले जात आहे.
वॉचमनने काय सांगितलं?
दोन दिवसांपूर्वी शेफाली जरीवाला आणि तिचे पती पराग त्यागी त्यांच्या कुत्र्यासोबत सोसायटीच्या आवारात फिरताना दिसले होते. शुक्रवारी शेफालीचे निधन झाल्याचे ऐकून त्यांना विश्वास बसला नाही. मुंबई पोलिसांनी दिलेल्या माहितीनुसार, शेफाली यांचा मृतदेह अंधेरी येथील त्यांच्या राहत्या अपार्टमेंटमध्ये आढळला. शवविच्छेदनास करण्यासाठी मृतदेह कूपर रुग्णालयात पाठवण्यात आला आहे. ती काही दिवसांपासून ब्युटी ट्रीटमेंट घेत असल्याचीही माहिती समोर आली आहे.
शेफालीच्या मृत्यूची बातमी समजल्यावर काय घडले, याबद्दल शत्रुघ्न म्हणाले की, एक माणूस मोटारसायकलवरून आला, कदाचित तो त्यांचा मित्र असावा. त्याने शेफालीच्या निधनाची माहिती दिली. आदल्या दिवशीच तिला पाहिल्यामुळे माझा त्यावर विश्वास बसला नाही, असंही शत्रुघ्न म्हणाले.
दोन दिवसांपूर्वी शेफाली आणि पराग त्यांच्या कुत्र्यासोबत सोसायटीच्या आवारात दिसले होते, असेही त्यांनी सांगितले. शेफालीला रुग्णालयात नेल्यानंतर थोड्याच वेळात पोलीस आणि फॉरेन्सिक युनिट घटनास्थळी दाखल झाले, असे शत्रुघ्न यांनी सांगितले. पोलिस रात्रभर आत होते. दोन मोबाइल फॉरेन्सिक युनिट वाहने होती- एक निघून गेली, एक अजूनही येथे आहे.
शेफाली जरीवाला यांना त्यांचे पती पराग त्यागी यांनी बेलूव्ह्यू हॉस्पिटलमध्ये नेले, तिथे त्यांना मृत घोषित करण्यात आले. सुरुवातीच्या वृत्तानुसार, शेफालीचा मृत्यू कार्डिअॅक अरेस्टने झाल्याचे सांगण्यात आले होते. मात्र, मुंबई पोलिसांनी दिलेल्या माहितीनुसार, शेफाली तिच्या मुंबईतील अंधेरी येथील अपार्टमेंटमध्ये मृतावस्थेत आढळली. त्यानंतर तिचा मृतदेह शवविच्छेदनासाठी कूपर रुग्णालयात पाठवण्यात आला. तिच्या मृत्यूचे कारण अद्याप समजू शकलेले नाही.
