उत्तर प्रदेशातील मेरठ जिल्ह्यात एका प्रेमकथेला वेगळाच ट्विस्ट पाहायला मिळाला आहे. 21 वर्षीय तरुण हर्षचा मृतदेह शेतात सापडला. सुरुवातीच्या तपासात हत्येचा संशय होता, परंतु पोलिसांनी तपास पुढे नेताच एक धक्कादायक गोष्ट समोर आली.
गंगानगर पोलीस स्थानकातील हद्दीत येणाऱ्या आदिपूर गावात हर्षची हत्या झाली. सुरुवातीला त्याच्या मित्राने हत्या केल्याचा पोलिसांचा संशय होता. दररोज सायंकाळी 6 वाजेपर्यंत मजुरी करुन घरी परतणारा हर्ष आला नाही म्हणून शोधाशोध झाली. तर बुधवारी सकाळी साडेनऊच्या सुमारास ऊसाच्या शेतात हर्षचा मृतदेह आढळला.
हर्षचं एका मुलीसोबत प्रेमसंबंध होते. या प्रेमाला मुलीच्या घरुन विरोध होता. त्यामुळे हर्षची हत्या ही प्रियसीच्या वडिलांनी आणि भावांनी केल्याचा आरोप हर्षच्या पालकांनी केला. पण पोलीस तपासात धक्कादायक प्रकार समोर आला आहे. भयानक वळण मिळाले जेव्हा २१ वर्षीय हर्षने आपल्या प्रेयसीच्या वडिलांना खोट्या प्रकरणात अडकवण्यासाठी स्वतःवर गोळी झाडली आणि त्याचा जीव गेला. बुधवारी सकाळी गंगानगर पोलीस स्टेशन परिसरातील अमेडा गावात गोळी झाडल्यानंतर हर्षचा मृतदेह शेतात आढळला.
पोटात गोळी झाडण्याचा प्लॅन होता, परंतु…
या प्रकरणात, गुन्ह्याच्या ठिकाणाहून मिळालेले पुरावे, कॉल डिटेल्स आणि सीसीटीव्ही फुटेज पाहिल्यानंतर असे आढळून आले की मृत हर्षवर त्याच्या अल्पवयीन मित्राने गोळी झाडली. आरोपीने चौकशीदरम्यान सांगितले की हर्षने स्वतः त्याला फोन करून जंगलात बोलावले. दोघांनी मिळून देशी दारूच्या दुकानातून दारू, हॉटेलमधून कबाब आणि जवळच्या दुकानातून पाणी विकत घेतले. त्यांनी ट्यूबवेलजवळील उसाच्या शेतात बसून दारू प्यायली. अल्पवयीन आरोपीने सांगितले की, मृत हर्ष त्याच गावातील एका व्यक्तीच्या मुलीशी बोलत असे. काही दिवसांपूर्वी मुलीच्या कुटुंबात आणि हर्षमध्ये यावरून वाद आणि भांडण झाले.
कुटुंबाने हर्षला बोलणे थांबवण्याचा इशारा दिला होता, अन्यथा पोलिसांकडे तक्रार दाखल केली जाईल. त्यानंतर, हर्षने कटाचा भाग म्हणून अल्पवयीन आरोपीला योजनेत समाविष्ट केले आणि त्याला सांगितले की, पोटात अशा प्रकारे गोळी मारावी की गोळी त्याच्या पोटाला स्पर्श करुन जाईल. जेणेकरून तो स्वतः प्रथम गुन्हा दाखल करू शकेल आणि मुलीच्या कुटुंबाला खोट्या प्रकरणात अडकवू शकेल. अल्पवयीन आरोपीने सांगितले की, दोघेही मद्यधुंद अवस्थेत होते आणि गोळी चालवताना त्या अल्पवयीन मुलाचं लक्ष्य चुकलाृं, ज्यामुळे गोळी पोटाऐवजी छातीत लागली आणि हर्ष जागीच मरण पावला. घटनेनंतर, अल्पवयीन आरोपी घाबरला आणि त्याने मृताचा मोबाईल ट्यूबवेलच्या छतावर फेकून पळून गेला.
दुसऱ्या दिवशी सकाळी तो गेला आणि मृताचे वडील संजय यांना शेतात पडलेला मृतदेह असल्याची माहिती दिली. चौकशीदरम्यान, हे देखील समोर आले की, घटनेपूर्वी, हर्ष आणि अल्पवयीन आरोपीने रात्री उशिरापर्यंत मुलीच्या बाजूच्या अनेक जवळच्या लोकांशी फोनवर समझोत्यासाठी चर्चा करत होते. ज्याची पुष्टी मोबाईल कॉल डिटेल्स आणि इतर तांत्रिक पुराव्यांद्वारे झाली आहे.