ठाणेकरांचा प्रवास सुखकर व्हावा, त्यांच्या वेळेची बचत व्हावी, यासाठी ठाणे शहरात रिंग रेल्वे मेट्रोच्या (वर्तुळाकार मेट्रो) कामाला केंद्र आणि राज्य सरकारने मंजूरी दिली आहे. पहिल्या टप्प्यात या प्रकल्पासाठी १४०० कोटींच्या निविदा काढल्या जाणार आहेत. उपमुख्यमंत्री एकनाथ शिंदे यांच्या हस्ते या प्रकल्पाचे भूमिपूजन लवकरच करून डिसेंबर २०२९ पूर्वी या मेट्रो मार्गिकांचे काम पूर्ण करणार असल्याची माहिती ठाण्याचे खासदार नरेश म्हस्के यांनी शुक्रचारी मेट्रोच्या अधिकाऱ्यांसोबत झालेल्या बैठकीनंतर दिली.
ठाण्याचा वाढता विस्तार लक्षात घेऊन ठाणेकरांची वाहतूककोंडीतून सुटका व्हावी, यासाठी उपमुख्यमंत्री एकनाथ शिंदे यांनी ठाणे अंतर्गत रिंग रेल्वे मेट्रोच्या कामाला गती दिली आहे. केंद्र सरकारकडून या प्रकल्पाला मंजुरी मिळाली असून भरीव निधीची तरतूद करण्यात आली आहे.
नुकत्याच दिल्लीत झालेल्या नगरविकास आणि गृहनिर्माणविषयक स्थायी समितीच्या बैठकीत खासदार म्हस्के यांनी कामाला सुरुवात करण्याचा मुद्दा उपस्थित केला होता. शुक्रवारी खासदार म्हस्के यांनी ठाणे अंतर्गत रिंग रेल्वे मेट्रो प्रकल्पाचे प्रकल्प संचालक राजीव त्यागी, मुख्य प्रकल्प अधिकारी सुनिलकुमार गर्ग, व्यवस्थापक प्रवीण पापळकर यांच्या समवेत कामाच्या प्रगतीवावत आढावा बैठक घेतली.
रायलादेवी ते बाळकूम नाका पहिला टप्पा
पहिल्या टप्प्यातील रायलादेवी ते बाळकुम नाका या २० किमी लांबीच्या कामासाठी १४०० रुपये कोटी रुपयांची निविदा मंजुरीच्या अंतिम टप्प्यात आहेत. सीआरझेडच्या अडचणीमुळे बाळकूम नाका ते रायलादेवी मार्गाची निविदा तीन महिन्यांनी निघणार आहे. वडवली, कावेसर येथे ठाणे मेट्रोचे प्रकल्पाच्या डेपोचे सर्वेक्षण सुरू असून तेथील नागरिकांच्या तक्रारी दूर करून डेपो बांधणीच्या कामाची निविदा अंतिम टप्प्यात आली आहे. अत्याधुनिक आणि आयकॉनिक स्थानके तयार करण्याची सूचना उपमुख्यमंत्री शिंदे यांनी दिल्यानुसार ही स्थानके बांधण्याचे नियोजन आहे.
अशी आहे ठाणे मेट्रो…
हा अंतर्गत रिंग रेल्वे मेट्रो प्रकल्प २९ किमी लांबीचा असून याचा एकूण खर्च १२ हजार २०० कोटींचा आहे. ही रेल्वे २६ किमी जमिनीवरून तर, तीन किमी जमिनीखालून (भूमिगत) धावणार आहे. याच्या मार्गिका अंतिम करण्यात आल्या आहेत. एकूण २२ स्थानके उन्नत तर, दोन स्थानके भूमिगत असणार आहेत. या प्रकल्पामध्ये वागळे इस्टेट, रोड नं. २२, लोकमान्य नगर, पोखरण रोड नं. १, पोखरण रोड नं. २, ग्लँडी अल्वारिस रोड, हिरानंदानी मिडोज, हिरानंदानी इस्टेट, कोलशेत, बाळकुम, राबोडी, ठाणा कॉलेज रोड, ठाणे स्थानक या परिसराचा समावेश आहे.
अडचणींवर मात करून कामांना सुरुवात
भूमिगत रेल्वे प्रकल्पाबाबत सुरुवातीला नागरिकांमध्ये गैरसमज निर्माण झाले होते. परंतु भूमिगत रेल्वेमुळे कोणत्याही इमारती अथवा बांधकामांना बाधा किंवा अडचण निर्माण होणार नाही. काम सुरू असताना सरकारचे विविध विभाग, ठाणे महापालिका, पाणीपुरवठा विभाग, मलनिःसारण, महानगर गैस, महावितरण संदर्भातील अडचणीवर मात करण्यासाठी सर्वेक्षणाचे काम पूर्ण झाले आहे.