सोलापूरमधील प्रसिद्ध मेंदूविकार तज्ज्ञ डॉ. शिरीष वळसंगकर यांच्या आत्महत्येने खळबळ उडाली होती. या प्रकरणात एक नवीन माहिती समोर आली आहे. डॉ. वळसंगकर यांनी रुग्णालयातील प्रशासकीय अधिकारी मनीषा मुसळे माने यांच्या मानसिक त्रासाला कंटाळून आत्महत्या केली, असा आरोप आहे. मात्र, न्यायालयात सादर केलेल्या दोषारोपपत्रात महत्त्वाचा ‘सीडीआर’ (कॉल डिटेल रेकॉर्ड) जोडलेला नाही. त्यामुळे तपासावर प्रश्नचिन्ह निर्माण झाले असून अॅड. प्रशांत नवगिरे यांनी ही बाब निदर्शनास आणली आहे.
डॉ. शिरीष वळसंगकर आत्महत्या प्रकरणात अनेक प्रश्न अजून अनुत्तरित आहेत. फिर्यादीत नमूद आहे की, डॉ. वळसंगकर यांनी मनीषा मुसळे माने यांच्या त्रासाला कंटाळून आत्महत्या केली. पण, त्यांना मनीषाशिवाय आणखी कोणाचा त्रास होता का? आत्महत्येच्या आदल्या दिवशी डॉक्टरांना कोणाचे फोन आले होते? त्यांनी कोणाला फोन केले होते? या प्रश्नांची उत्तरे ‘सीडीआर’मधून मिळण्याची शक्यता होती.
पोलिसांनी न्यायालयात ७२० पानांचे दोषारोपपत्र दाखल केले आहे. अॅड. प्रशांत नवगिरे यांनी सांगितले की, या दोषारोपपत्रात ‘सीडीआर’ जोडलेला नाही. कौटुंबिक कलहाची चर्चा होती, पण दोषारोपपत्रात त्याबद्दल काहीही माहिती नाही. दोषारोपत्रातील 350 पाने बँकेच्या स्टेटमेंटची आहेत. एफआयआरमध्ये नोंद आहे की, डॉ. शिरीष वळसंगकर यांनी एसपी न्युरोसायन्स रुग्णालयाच्या प्रशासकीय अधिकारी मनीषा मुसळे यांच्या त्रासाला कंटाळून आत्महत्या केली. पोलिसांनी मनीषा मुसळे यांना दोन वेळा कोर्टात हजर केले. त्यांना पोलीस कोठडी देण्याची मागणी केली.
मनीषा मुसळे यांनी काही गैरव्यवहार केला आहे का, हे तपासण्यासाठी पोलिसांनी त्यांच्या बँक स्टेटमेंटची माहिती जोडली आहे. ७२० पानांच्या दोषारोपपत्रात जवळपास ३५० पाने बँकेच्या स्टेटमेंटची आहेत.
डॉ. शिरीष वळसंगकर यांचे कॉल डिटेल्स (सीडीआर) जोडलेले नाहीत. डॉ. शिरीष वळसंगकर यांनी आत्महत्येच्या दिवशी, १८ एप्रिल रोजी सायंकाळी साडेसहा व सव्वासात वाजता आपण आत्महत्येचा निर्णय घेतल्याचे मुलगा डॉ. अश्विन यांना सांगितले होते.
दरम्यान, आता या प्रकरणाचा तपास कोणत्या दिशेने जातो, हे पाहणे महत्वाचे आहे. ‘सीडीआर’ नसल्यामुळे तपासावर प्रश्नचिन्ह निर्माण झाले आहे.