पुण्याला मित्राकडे जात आहे असं म्हणून निघालेल्या नांदेडच्या एका वृत्तपत्र विक्रेत्याची जालना येथे हत्या झाल्याची घटना समोर आली आहे. आरोपीचा गळा आवळून आणि डोक्याला पाठीमागील बाजूस धारदार वस्तूने मारुन त्याची हत्या केल्याचं समोर आलं आहे. गुरुवारी दुपारी ही घटना घडली. याप्रकरणी जालनाच्या स्थानिक गुन्हे शाखेने मृताची ओळख पटवून एका मारेकऱ्याला जेरबंद केलं आहे. रामेश्वर उर्फ बाळा दत्तराव पवार (३१) असं मृत व्यक्तीचं नाव आहे. चोरीच्या उद्देशाने आरोपीने हत्या केल्याचा संशय पोलिसांकडून व्यक्त केला जात आहे. या घटनेने परिसरात खळबळ उडाली आहे.
जालन्यातील व्यक्तीची नांदेडमध्ये हत्या
रामेश्वर पवार हा नांदेड जिल्ह्यातील रहिवासी असून तो वृत्तपत्र विक्रेता होता. राज्य वृत्तपत्र विक्रेता संघटनेचे कार्याध्यक्ष बालाजी पवार यांचा तो लहान भाऊ होता. सोमवार ९ जून रोजी तो पुण्याला जातं आहे असं म्हणून घरातून निघून गेला. गुरुवारी १२ जून रोजी दुपारी जालन्याहून पवार कुटुंबाला पोलिसांचा फोन आला आणि त्यांनी आपल्या कुटुंबातील कुणी बेपत्ता आहे का अशी विचारणा करुन जालन्यात यावं असा निरोप दिला. त्यानुसार नांदेडहून वृत्तपत्र वितरक बालाजी पवार आणि कुटुंबीय जालन्याला गेले असता त्यांनी तेथील मृताची ओळख पटवली. या हत्येच्या घटनेने पवार कुटुंब हादरलं आहे.
आरोपी पोलिसांच्या ताब्यात
याबाबत जालन्यातील सदर बाजार पोलिस ठाण्याचे संतोष जाधव यांनी दिलेल्या फिर्यादीवरुन, १० जून रोजी जालना येथे गुरनं ४९६/२५ कलम १०३(१) भा.न्यां.सं. अन्वये गुन्हा दाखल करण्यात आला होता. सदर अनोळखी मयत इसमाची ओळख पटवून अज्ञात आरोपीचा शोध पोलिसांकडून सुरु होता. जालना स्थागुशा पथकाने या घटनेतील मारेकऱ्याचा शोध घेत सीसीटीव्ही फुटेजच्या आधारे जालना येथील ५८ वर्षीय आबासाहेब विठ्ठलराव घोडके याला ताब्यात घेतलं. चौकशी केली असता त्याने या गुन्ह्यातील सहभागाची कबुली दिली. तसंच मृत रामेश्वरकडील मोबाईल आणि पैसे आपण चोरण्याचा प्रयत्न केल्यावर त्याने प्रतिकार केल्याने आपण त्याचा गळा आवळून आणि लाकडाने मारुन हत्या केली, अशी कबुलीही आरोपी घोडकेने दिली.